راجن پور: (دنیا نیوز) راجن پور میں قومی اسمبلی کے حلقہ این اے 193 کے ضمنی الیکشن میں پاکستان تحریک انصاف نے بھاری مارجن سے میدان مار لیا، مسلم لیگ (ن) اور پیپلز پارٹی کے امیداروں کو بدترین شکست کا سامنا کرنا پڑا۔
میری آزادی میری انا ہے، جامپور میں جیت کا جشن#عوام_کی_جیت pic.twitter.com/d4eLDP8i3x
— PTI Azad Kashmir (@PTIAJK_Official) February 26, 2023
237 پولنگ سٹیشنز کے غیر حتمی اور غیر سرکاری نتائج موصول ہو گئے جن کے مطابق پاکستان تحریک انصاف کے محسن لغاری 90392 ووٹ لیکر پہلے نمبر پر رہے ان کے مخالف مسلم لیگ (ن) کے عمار لغاری 55218 ووٹوں کے ساتھ ان سے پیچھے رہے، پیپلز پارٹی کے اختر حسن گورچانی 20074 ووٹ لے کر تیسرے نمبر پر آئے ہیں۔
ضمنی انتخابات جیتنے کی خوشی میں راجن پور میں پاکستان تحریک انصاف کی جانب سے جشن منایا گیا، پی ٹی آئی کی کامیابی پر کارکنوں نے ایک دوسرے کو مٹھائی کھلائی، کئی مقامات پر آتش بازی کی گئی اور ڈھول کی تھاپ پر بھنگڑے بھی ڈالے گئے، اس کامیابی کو کارکنوں نے عمران خان کے موقف کی جیت قرار دیا۔
جام پور : این اے 193 ضمنی الیکشن، صدر جنوبی پنجاب سینیٹرعون عباس بپی کا مینا لغاری کے ہمراہ مختلف پولنگ اسٹیشنز کا دورہ
— PTI (@PTIofficial) February 26, 2023
آج کا دن پی ٹی آئی امیدوار محسن لغاری اور عمران خان کے نظریے کی کامیابی کا ہوگا، عون عباس بپی
#بلے_پہ_ٹھپہ pic.twitter.com/Yhef7eNDwi
حلقہ این اے 193 میں ضمنی انتخاب کیلئے صبح 8 بجے شروع ہونے والی پولنگ کا عمل شام 5 بجے تک جاری رہا، 3 لاکھ 79 ہزار 204 کے قریب ووٹرز نے حق رائے دہی استعمال کیا۔
ضمنی الیکشن میں 11 امیدواروں کے درمیان مقابلہ ہوا تاہم اصل مقابلہ (ن) لیگ اور پی ٹی آئی کے درمیان تھا، محسن لغاری اور عمار لغاری میں کانٹے کا مقابلہ ہونے کی توقع کی جا رہی تھی لیکن نتائج اس کے برعکس آئے ہیں، پیپلز پارٹی کے اختر حسن گورچانی بھی یہاں سے امیدوار ہیں۔
عوام کا موڈ بتا رہا کہ
— PMLN (@pmln_org) February 26, 2023
انشاءاللہ این اے 193 میں شیر آرہا ہے#VoteSherKa pic.twitter.com/xZj2nkZvHb
الیکشن کمیشن کی جانب سے حلقے میں ووٹنگ کیلئے 237 پولنگ سٹیشن قائم کیے گئے جن میں سے 68 کو حساس قرار دیا گیا، کسی بھی ناخوشگوار صورتحال سے نمٹنے کیلئے 2 ہزار 650 پولیس اہلکار تعینات کیے گئے تھے، رینجرز اور آرمی کے جوانوں نے بھی گشت کیا۔
واضح رہے راجن پور کے حلقہ این اے 193 کی نشست پاکستان تحریک انصاف کے رکن قومی اسمبلی سردار جعفر لغاری کے انتقال پر خالی ہوئی تھی، اس سے قبل پنجاب حکومت کی جانب سے این اے 193 کا ضمنی انتخاب ملتوی کرنے کی درخواست بھی کی گئی تھی۔
