لاہور: (دنیا نیوز) ڈپٹی سیکرٹری جنرل پاکستان مسلم لیگ ن عطاءاللہ تارڑ نے کہا ہے کہ سپریم کورٹ فیصلے سے ملک دشمن عناصر کے حوصلے بڑھیں گے۔
سپریم کورٹ کی جانب سے فوجی عدالتوں میں سویلینز کا ٹرائل کالعدم قرار دینے کے فیصلے پر رد عمل میں ن لیگی رہنما عطا اللہ تارڑ نے کہا کہ پی ٹی آئی کے چیئرمین نے نو مئی کو ایک مذموم سازش کے تحت قومی سلامتی کے ادارے پر حملے کروائے، شہدا کی یادگاروں کو مسمار کرنے والے قومی مجرم ہیں اور کسی رعایت کے مستحق نہیں۔
انہوں نے کہا کہ کیا غیر ملکی ایجنٹ جو دشمنوں کی حمایت سے ملک کے اندر انتشار پھیلاتے ہیں، ان کا بھی ملٹری کورٹس میں ٹرائل نہ کیا جائے، پارلیمنٹ نو مئی کے ملزمان کا ملٹری کورٹس میں ٹرائل کیے جانے کی قرارداد جون میں منظور کر چکی ہے۔
یہ بھی پڑھیں: نوازشریف مری میں اپنی رہائش گاہ پہنچ گئے، لیگی کارکنوں نے والہانہ استقبال کیا
عطاءاللہ تارڑ نے کہا کہ پارلیمنٹ کی اس قرارداد کی موجودگی میں سپریم کورٹ کے اس فیصلے کی گنجائش نہیں بنتی، ملٹری کورٹس کے فیصلوں کے خلاف اپیل کا حق موجود ہے جس سے ملزمان کے قانونی حقوق کو تحفظ ملتا ہے۔
لیگی رہنما نے کہا کہ قانونی سسٹم میں بہت سی خامیاں موجود ہیں جن کی وجہ سے ملزمان سزا سے بچ جاتے ہیں، پوری دنیا میں سپیشل کورٹس بنائے جانے کی مثالیں موجود ہیں۔
