لاہور: (دنیا نیوز) لاہور ہائیکورٹ نے کم عمر ڈرائیورز کا کریمنل ریکارڈ بنانے کا نوٹس لیتے ہوئے سی ٹی او لاہور اور ایس ایس پی انویسٹی گیشن کو ذاتی حیثیت میں طلب کر لیا۔
لاہور ہائیکورٹ کے جسٹس علی ضیا باجوہ نے کم عمر ڈرائیورز کا کریمنل ریکارڈ بنانے کے خلاف شہری اعظم بٹ کی درخواست پر سماعت کی، درخواست گزار کی جانب سے وکیل رانا سکندر ایڈووکیٹ عدالت میں پیش ہوئے۔
دوران سماعت وکیل درخواست گزار نے دلائل دیتے ہوئے کہا کہ بچوں کا انگوٹھا لگوایا جاتا ہے جس پر جسٹس علی ضیا باجوہ نے سرکاری وکیل سے استفسار کرتے ہوئے ریمارکس دیئے کہ میں آخری مرتبہ کہہ کر گیا تھا کہ نام ریکارڈ میں شامل نہیں کیا جائے گا، سی ٹی او نے ایسی کوئی بات کی تو نہیں تھی، سی ٹی او کی بات آپ نے کہاں سنی؟
عدالت نے بچوں کا نام سی آر او میں شامل کرنے پر سی ٹی او لاہور اور ایس ایس پی انویسٹی گیشن سے رپورٹ طلب کرتے ہوئے دونوں کو ذاتی حیثیت میں 5 دسمبر کو طلب کر لیا۔
