اسلام آباد: (دنیا نیوز) پاکستان تحریک انصاف کے چیئرمین بیرسٹر گوہر نے کہا ہے کہ چاہے انڈر 19 ٹیم کے ساتھ لڑنا پڑے، ہم انتخابات میں حصہ لیں گے۔
بیرسٹر گوہر کا کہنا تھا کہ کسی بھی متعلقہ آر او نے ٹھیک احکامات جاری نہیں کیے، ہمارے کاغذات نامزدگی مسترد کیے گئے، 8 فروری کو جیت صرف پی ٹی آئی کی ہوگی، سپریم کورٹ نے کہا ہے الیکشن بروقت ہوں گے، کچھ لوگ ہتھکنڈے استعمال کر رہے ہیں کہ انتخابات تاخیر کا شکار ہوں۔
انہوں نے کہا کہ ایک پارٹی کو اگر الیکشن سے نکالا جائے گا تو جمہوریت ڈی ریل اور پارلیمنٹ کمزور ہوگی، کسی صورت انتخابات کا بائیکاٹ نہیں کریں گے، ہم لڑیں گے، فیصلہ عوام نے کرنا ہے کہ کس کو ووٹ دینا ہے۔
یہ بھی پڑھیں: انتخابات: این اے 132 سے شہبازشریف کے کاغذات نامزدگی منظوری کیخلاف اپیل دائر
بیرسٹر گوہر نے کہا کہ پورے پاکستان میں سب سے زیادہ ہماری پارٹی مقبول ہے، ہم نے عدلیہ سے درخواست کی تھی کہ لیول پلیئنگ فیلڈ دستیاب کریں، اس بار سرِعام لوگوں کو روکا گیا، مارا گیا، کاغذات چھینے گئے۔
چیئرمین پی ٹی آئی نے کہا کہ مولانا فضل الرحمان کی پارٹی پورے پاکستان کی نہیں، انتخابات الیکشن کمیشن نے کرانے ہیں، مولانا کی واحد پارٹی ہے جو کہہ رہی ہے کہ الیکشن نہ ہوں، الیکشن میں تمام سکیورٹی انتظامات ہونے چاہئیں، ہماری دعا ہے الیکشن خوش اسلوبی سے ہوں۔
بیرسٹر گوہر کا کہنا تھا کہ ساری پارٹیوں کو الیکشن میں حصہ لینے کا بھرپور موقع ملنا چاہئے، جو حکومت ہارس ٹریڈنگ کے نتیجے میں بنے گی وہ کیسے ڈلیور کرے گی؟ جو شخص تاحیات نااہل ہے اس کا راستہ روکیں گے۔
