لاہور: (دنیا نیوز) پاکستان پیپلز پارٹی کے چیئرمین بلاول بھٹو زرداری نے کہا کہ سنا تھا لاہور میں ن لیگ کا راج ہے مگر این اے 127 میں امیدوار کون ہے کوئی نہیں جانتا، کیا آپ کو پتہ ہے یہاں (ن) لیگ کا اُمیدوار کون ہے؟۔
این اے 127 میں ورکرز کنونشن سے خطاب کرتے ہوئے بلاول بھٹو زرداری نے کہا کہ ہم الیکشن میں اُتر چکے ہیں مگر کوئی دوسرا نظر نہیں آ رہا ہے، لاہور میں ن لیگ نظر آ رہی ہے نہ پی ٹی آئی کہیں دکھائی دیتی ہے۔
چیئرمین پیپلز پارٹی نے کہا کہ پیپلز پارٹی لاہور میں الیکشن کے لیے تیار ہے، ہماری ٹیم دن رات محنت کرے گی اور عوام کی آواز بنیں گے، پیپلز پارٹی لاہور میں بھی بڑے جذبے کیساتھ الیکشن لڑنے کیلئے تیار ہے۔
— PPP (@MediaCellPPP) January 10, 2024
بلاول بھٹو نے کہا کہ پارٹی نے فیصلہ کیا ہے کہ انتخابی مہم میں فیصل میر میری نمائندگی کریں گے، ہم پیچھے ہٹنے والے اور گھبرانے والے نہیں، لاہور کل بھی بھٹو کا تھا اور آج بھی بھٹو کا ہے۔
انہوں نے کہا کہ وزیراعظم بنا تو تنخواہوں میں اضافہ کروں گا، اگر موقع ملا تو 300 یونٹ بجلی مفت دوں گا، 30 لاکھ گھر بنانے کیلئے آپ نے تیر پر ٹھپہ لگانا ہے، ہمارے 10 نکاتی منشور کو آپ نے گھر گھر پہنچانا ہے۔
— PPP (@MediaCellPPP) January 10, 2024
چیئرمین پیپلزپارٹی نے کہا کہ نوجوانوں کی یوتھ کارڈ کے ذریعے مدد کریں گے، ہم بینظیر مزدور کارڈ بھی متعارف کرائیں گے، ہمارا مقابلہ کسی سیاسی جماعت سے نہیں غربت اور بےروزگاری سے ہے، 8 فروری کو ملک میں الیکشن ہو رہے ہیں۔
بلاول بھٹو نے کہا کہ ذاتی انا کی سیاست کو دفن کر کے 8 فروری کو نئی سیاست کا آغاز کریں گے، 8 فروری کو الیکشن ہوں گے، (ن) لیگ چاہے کچھ بھی کر لے۔
یہ بھی پڑھیں: پیپلزپارٹی نے خیبرپختونخوا کی صوبائی نشستوں کیلئے ٹکٹ ہولڈرز کے نام جاری کر دیئے
انہوں نے کہا کہ ہم ملک میں غربت کا مقابلہ کریں گے، ہماری حکومت آئی تو بی آئی ایس پی میں مزید اضافہ کریں گے، 10 نکاتی معاشی معاہدے سے بیروزگاری کا خاتمہ کریں گے۔
