اسلام آباد: (دنیانیوز) نائب صدر پیپلز پارٹی سینیٹر شیری رحمان نے کہا ہے کہ پاکستان کے بعد اب امریکی ایوان میں بھی سائفر بیانیہ کو جھوٹ کا پلندا کہہ کر مسترد کیا گیا ہے۔
نائب صدر پیپلز پارٹی سینیٹر شیری رحمان نے امریکی کانگریس کی خارجہ اُمور کمیٹی میں ڈونلڈ لو کے بیان پر ردعمل دیتے ہوئے کہا ہے کہ امریکی کانگریس کی خارجہ اُمور کمیٹی میں ڈونلڈ لو نے واضح طور پر سائفر بیانیہ ایک جھوٹ قرار دیا۔
شیری رحمان نے کہا کہ اب یہ باضابطہ طور پر طے ہو چکا ہے کہ سائفر کو بنیاد بنا کر پی ٹی آئی نے اپنے سیاسی مقاصد کا تحفظ کیا، آڈیو لیک میں بانی پی ٹی آئی اور ان کے ساتھی سائفر پر سیاست کھیلنے کی منصوبہ بندی کرتے سنائی دیئے۔
یہ بھی پڑھیں:سائفر الزام جھوٹ، پاکستان کے انتخابی عمل میں مداخلت کی تحقیقات ہونی چاہئیں: ڈونلڈ لو
انہوں نے کہا کہ بانی پی ٹی آئی کے پرنسپل سیکرٹری سائفر کیس سماعت میں تفصیلی وضاحت پیش کر چکے ہیں، ایک سفارتی تحریر کو سیاسی اور ذاتی مفادات کیلئے توڑ مروڑ کر پیش کیا گیا، سائفر بیانیہ کو اپنے چھوٹے سیاسی مقاصد کے حصول کیلئے ملکی اور خارجی مفادات کو داؤ پر لگانے کی بدترین مثال کے طور پر یاد رکھا جائے گا۔
