کراچی: (دنیا نیوز) کراچی میں گرمی کی شدید لہر سے شہریوں کا برا حال ہو گیا، سندھ رینجرز نے عوام کے لیے اہم اقدام اٹھاتے ہوئے شہر کے مختلف علاقوں میں ہیٹ سٹروک سینٹرز قائم کردیئے۔
ہیٹ سٹروک کیمپس پر ٹھنڈے پانی اور شربت کے سٹالز لگا دیئے گئے، شہر کی اہم شاہراہوں اور عوامی مقامات پر ہیٹ سٹروک سینٹرز میں رینجرز کے ڈاکٹرز اور پیرا میڈیکل سٹاف بھی موجود ہے۔
ترجمان سندھ رینجرز کا کہنا ہے کہ شہریوں کو گرمی سے بچاؤ کے لیے مختلف طبی سہولیات بھی فراہم کی جا رہی ہیں، کیمپ میں ٹھنڈے پانی کی بوتلیں، او آر ایس کے پیکٹس، مختلف ادویات اور ڈرپس موجود ہیں۔
سندھ رینجرز کے ترجمان نے بتایا کہ شہریوں کی بڑی تعداد رینجرز ہیٹ سٹروک سینٹرز سے استفادہ کر رہی ہے، نادرن بائی پاس، ملیر لنک روڈ، الاظہر گارڈن، گلزار ہجری، ٹینک چوک، ملیر کالا، بورڈ بس سٹاپ، بلدیہ ٹاؤن، الاصف سکوائر پر کیمپ قائم کیے گئے ہیں۔
ترجمان سندھ رینجرز نے مزید بتایا ہے کہ نیو سبزی منڈی، لیبر سکوائر، گلشن معمار، چاندنی چوک اور 24 مارکیٹ میں بھی ہیٹ سٹروک سینٹرز بنائے گئے ہیں۔
