کراچی: (رطابہ عروس) مون سون کے زوردار سپیل سے کراچی میں موسلا دھار بارش نے متعدد علاقے پانی میں ڈبو دیئے۔
سب سے زیادہ بارش گلشن حدید میں 46 ملی میٹر ریکارڈ کی گئی، گلستان جوہر، جیل چورنگی، لیاقت آباد، کریم آباد، صفورا اور سکیم 33 کے مختلف علاقوں میں موسلا دھار بارش نے رنگ جما دیا، ناظم آباد میں 26، سرجانی ٹاؤن میں 25 ملی میٹر بارش ریکارڈ کی گئی ہے۔
محکمہ موسمیات کے مطابق شہر میں آج بھی وقفے وقفے سے درمیانی سے تیز شدت کی بارش کا سلسلہ جاری رہنے کی توقع ہے۔
موسم کا احوال بتانے والوں کا کہنا ہے کہ بارش برسانے والے سسٹم کے تحت کراچی میں31 اگست تک وقفے وقفے سے موسلا دھار بارش کا امکان ہے، تیز ہواؤں اور بارشوں سے کمزور چھتیں اور دیواریں گر سکتی ہیں۔
محکمہ موسمیات نے بل بورڈز، بجلی کے کھمبوں اور سولر پینلز کو خطرناک قرار دے دیا، ماہی گیروں کو غیر ضروری طور پر سمندر میں نہ جانے کا بھی مشورہ دیا گیا ہے۔
چیف میٹرولوجسٹ سردار سرفراز کا کہنا ہے کہ یہ سپیل مون سون کا سب سے طاقتور سپیل ہو سکتا ہے، اس سپیل سے کراچی میں 150 تا 200 ملی میٹر تک بارش متوقع ہے۔
سردار سرفراز کا مزید کہنا ہے کہ ٹھٹھہ، سجاول، میرپورخاص، سانگھڑ اور نوابشاہ میں 250 سے 300 ملی میٹر بارش کا امکان ہے جبکہ بدین، ٹنڈو محمد خان، تھرپارکر اور عمرکوٹ میں 500 ملی میٹر بارش متوقع ہے جس سے نشیبی علاقے زیر آب آنے کا خطرہ ہے۔
دوسری جانب آج شہر کا کم سے کم درجہ حرارت 25.5 جبکہ زیادہ سے زیادہ درجہ حرارت 31 سے 33 ڈگری سینٹی گریڈ تک بڑھنے کا امکان ہے تاہم ہوا میں نمی کا تناسب 88 فیصد ریکارڈ کیا گیا ہے۔
