اسلام آباد : (دنیانیوز) انسداد دہشتگردی عدالت اسلام آباد نے پی ٹی آئی ورکرز اور رہنماؤں پر درج 6 مختلف مقدمات کے معاملے میں غیرحاضر ملزمان علی نواز، عامر مغل و دیگر کے وارنٹ گرفتاری جاری کردیے گئے۔
انسدادِ دہشت گردی عدالت کے جج طاہر عباس سپرا نے کیسز پر سماعت کی ، عدالت نے بانی پی ٹی آئی کی حاضری کے حوالے سے سپرٹنڈنٹ اڈیالہ جیل سے رپورٹ طلب کرلی۔
تھانہ سنگجانی کے مقدمہ میں علی نواز اعوان ، عامر مغل و دیگر غیر حاضر ملزمان کے وارنٹ گرفتاری جاری کردیے گئے جبکہ تھانہ رمنا میں درج مقدمات میں حماد اظہر، مراد سعید ، فرخ حبیب، واثق قیوم و دیگر غیر حاضر ملزمان کے وارنٹ کی تعمیلی رپورٹ طلب کرلی گئی۔
تھانہ سی ٹی ڈی، تھانہ سنگجانی ، تھانہ رمنامیں کیسز کی سماعت 2 دسمبر تک ملتوی کردی گئی ، تھانہ گولڑہ اور بارہ کہو میں درج مقدمات کی سماعت 9 دسمبر تک ملتوی کردی گئی ۔
عامر محمود کیانی و دیگر حاضر ملزمان کی حاضری لگائی گئی ، ملزمان کیخلاف تھانہ سی ٹی ڈی میں 1 ،تھانہ گولڑہ میں 1، تھانہ رمنا میں 2 ، 1 مقدمہ تھانہ سنگجانی اور 1 تھانہ بارکہو میں درج ہے۔
تمام مقدمات مختلف موقعوں پر احتجاج اور توڑ پھوڑ کے باعث انسدادِ دہشت کی دفعات کے تحت درج ہیں۔
