کراچی: (دنیا نیوز) میئر کراچی مرتضیٰ وہاب نے کہا ہے کہ وہ فاروق ستار، مصطفیٰ کمال اور خالد مقبول کے ساتھ کام کرنے کو تیار ہیں۔
کراچی میں پاکستان یوتھ پارلیمنٹ کی تقریب سے خطاب کرتے ہوئے میئر کراچی مرتضیٰ وہاب نے کہا ہے کہ کوئی بھی شخص جو اچھے فیصلے کر رہا ہو وہ لیڈر ہو سکتا ہے، ہماری پارٹی کے لیڈر بلاول بھٹو ہیں۔
انہوں نے کہا کہ ہمارے معاشرے میں بہت ناامیدی پیدا ہو گئی ہے، پاکستان کے سارے لوگ ملک چھوڑ کر تو نہیں جا سکتے، لیڈر شپ اور نوجوان نسل میں تعلق بنانے کی ضرورت ہے۔
مرتضیٰ وہاب کا کہنا تھا کہ کراچی کا سب سے بڑا مسئلہ پینے کے پانی کا ہے، لاہور میں زیر زمین میٹھا پانی موجود ہے مگر یہاں نہیں، پانی کے مسئلے پر لاہور کی مثال کراچی میں نہیں دے سکتے، بحثیت شہری ہم اپنا فرض نہیں ادا کرتے، جب سب اپنے فرائض نبھانے لگیں گے تو مسائل حال ہو جائیں گے۔
میئر کراچی نے مزید کہا کہ ہم کام کرنا چاہتے ہیں، فاروق بھائی میرے ساتھ چلیں جس طرح کہیں گے کام کریں گے، گراؤنڈ رئیلیٹی دیکھ کر فاروق ستار، مصطفیٰ کمال اور خالد مقبول کام کرنا چاہتے ہیں تو تیار ہوں، باتیں اور پریس کانفرنس کرنے سے خدمت نہیں ہوتی، ہر سیاسی جماعت کو کہتا ہوں ہمارے دروازے کھلے ہیں۔
مرتضیٰ وہاب کا کہنا تھا کہ اسلام آباد میں بیٹھے ہوئے حضرات کراچی کے لیے اپنا دل بڑا کریں، ملک بھر میں وفاقی حکومت موٹر وے بنا رہی ہے، وفاق، سکھر حیدرآباد موٹر وے کیوں نہیں بنا رہی؟ وزیراعظم سے کہتا ہوں کراچی کے لیے خزانے کھولیں، کراچی کو 15 ارب نہیں 1500 ارب روپے ملنے چاہئیں، ڈویلپمنٹ کسی اور شہر کو زیادہ ملتی ہے کراچی کو نہیں ملتی۔
انہوں نے مزید کہا ہے کہ ایم کیو ایم پاکستان والوں سے کہتا ہوں آئیں مل کر کام کریں، ایم کیو ایم سے کہتا ہوں کہ لڑائی کرنے سے معاملات حل نہیں ہوں گے، ایم کیو ایم وزیراعظم کو کہے کہ وفاق کراچی کی مدد کرے۔
