اسلام آباد:(دنیا نیوز) چیف آرگنائزر پی ٹی آئی پنجاب عالیہ حمزہ کی دعوت پر اپوزیشن اتحاد کے سربراہ محمود خان اچکزئی نے پی ٹی آئی احتجاج میں شرکت کا اعلان کردیا۔
عالیہ حمزہ کی اسلام آباد میں پنجاب بھر سے پارٹی قائدین کے وفد کے ہمراہ محمود خان اچکزئی سے ملاقات ہوئی، ملاقات میں انہوں نے پنجاب میں اپوزیشن کے احتجاج پر مشاورت سمیت مختلف سیاسی امور پر تبادلہ خیال کیا۔
ملاقات کے دوران عالیہ حمزہ نے سربراہ اپوزیشن اتحاد کو پنجاب میں پارٹی اجلاسوں سے متعلق آگاہ کیا، اپنی گفتگو میں ان کا کہنا تھا کہ 8 فروری کو پنجاب کی قیادت اور ورکر بھرپور انداز سے نکلیں گے۔
محمود خان اچکزئی نے وفد سے گفتگو کرتے ہوئے کہا کہ پاکستان میں آئین کی سربلندی کے لئے جدوجہد جاری رہے گی، مسائل کا حل آئین پر عمل سے ہے۔
دوسری جانب باوثوق ذرائع نے دعویٰ کیا ہے کہ چیف آرگنائزر پی ٹی آئی عالیہ حمزہ نے محمود خان اچکزئی کو پنجاب کے احتجاج میں شرکت کی دعوت دی، محمود خان اچکزئی نے عالیہ حمزہ کی پنجاب کے احتجاج میں شرکت کی دعوت قبول کرلی۔
ذرائع نے بتایا ہے کہ 8 فروری کے بعد پنجاب کے تمام احتجاجی مظاہروں میں محمود خان اچکزئی بھی شریک ہوں گے، پنجاب میں الائنس کے پلیٹ فارم سے حکومت مخالف مظاہرے کریں گے۔
علاوہ ازیں عالیہ حمزہ نے بانی چیئرمین کا پیغام بھی محمود خان اچکزئی تک پہنچایا،انہوں نے چیف آرگنائزر پنجاب کی تعریف کی ۔
