اسلام آباد:(دنیا نیوز)سابق وفاقی وزیر فواد چودھری نے کہا ہے کہ 26ویں ترمیم کےبعد مرضی کےججزکولایا جارہا ہے۔
دنیا نیوز کے پروگرام’’ٹونائٹ ود ثمرعباس‘‘میں گفتگوکرتے ہوئے فواد چودھری کا کہنا تھا کہ پندرہویں نمبرز والے جج کو نمبرون کرنے کی کوشش کی جارہی ہے، ایسا عمل زیادتی ہے۔
انہوں نے کہا کہ 26ویں ترمیم کے بعد مرضی کے ججز کو لایا جا رہا ہے، ججز کو میرٹ پر لانا چاہیے اور ججزکا میرٹ پرتبادلہ کرنا چاہیے۔
سابق وفاقی وزیر کا کہنا تھا امریکا1937میں جس بحران میں تھا ویسے ہی پاکستان کوبحران کا سامنا ہے، ابھی تک وکلا کی طرف سےکوئی متاثرکن حکمت عملی سامنے نہیں آئی۔
ایک اور سوال کے جواب میں فواد چودھری نے کہا کہ ہمیشہ سےکہہ رہا ہوں کہ پی ٹی آئی کوالائنس بنانا ہوگا، مذاکرات دوبارہ شروع ہو سکتے ہیں۔
عون چودھری سے ملاقات کے سوال پر اُن کا کہنا تھا کہ عون چودھری اور عاطف خان کی ملاقات سےمتعلق شیخ وقاص نے چھوٹی بات کی ہے، خود وہ کس کس سے نہیں ملتے، اُن پر تو اس سے زیادہ سنگین الزامات ہیں، سیاست دانوں کےآپس میں تعلقات ہوتے ہیں، ایسی کوئی بات نہیں۔
سابق وفاقی وزیر کا مزید کہنا تھا کہ جنید اکبر ایک تگڑے سیاسی ورکر ہیں، بات سیدھی ہے اس حکومت سے کچھ لینا ہے تو سڑکوں پر پریشربڑھانا ہو گا۔
