اسلام آباد: (ویب ڈیسک) وفاقی وزیر برائے منصوبہ بندی و ترقی احسن اقبال نے کہا ہے کہ سرکاری شعبہ کی یونیورسٹیوں میں سیرت چیئرز کے قیام کا مقصد ہماری آنے والی نسل میں نوجوانوں کو جدید دور کی تعلیم سے آراستہ کرنے کے ساتھ انہیں سیرت کی روشنی میں فکری و نظریاتی تعلیم سے بھی ہمکنار کرنا ہے۔
وفاقی وزیر احسن اقبال نے سیرت سنٹر لاہور کے آپریشنل اور گورننس پلان کے حوالے سے اجلاس کی صدارت کرتے ہوئے کہا کہ اس منصو بہ کے تحت تین بڑے اجزاء یعنی پبلک سیکٹر یونیورسٹیوں میں 09 سیرت چیئرز کا قیام دوسرا خواتین کے لئے صنفی مطالعہ اور حقوق کے لئے عالمی معیار کے مرکز کا آغاز اورتیسرا انڈومنٹ فنڈ کی تشکیل شامل ہے۔
احسن اقبال نے مزید کہا کہ اس اقدام کا مقصد نبی اکرمﷺ کی زندگی سے اخذ کردہ 9 موضوعات عقیدہ اور فرقہ وارانہ ہم آہنگی، قیادت اور حکمرانی، انسانی حقوق اور سماجی انصاف، کاروبار، تجارت اور جائیداد کے حقوق، بمقابلہ تعلیم اور علم، پائیدار ترقی، سماجی انصاف اور بہبوداور خواتین کے حقوق اور عالمی امن کے تحت شعبوں میں معیاری تحقیق کرنا شامل ہے۔
وفاقی وزیر کا کہنا تھا کہ خواتین سیرت سنٹر لاہور بنانے کا مقصد جنڈر سٹڈیز میں سنٹر فار ایکسلینس قائم کرنا ہے تاکہ ہماری نوجوان نسل میں مذہب سے دوری کی جو لہر پیدا کی جا رہی ہے اس کا موثر علمی اور فکری سطح پر مقابلہ کیا جا سکے۔
انہوں نے کہا کہ اس سنٹر کا مقصد یہ ہے کہ ہم اپنی اقدار کو آج کے جدید دور کے تقاضوں کی روشنی میں اپنی خواتین اور بچیوں کو یہ اعتماد دیں کہ سیرت اور اسلامی تعلیمات انہیں ایک با وقار اور کامیاب زندگی گزارنے کا راستہ سکھاتی ہے۔
