کوئٹہ:(دنیا نیوز) کوئٹہ سے پشاور جانے والی جعفر ایکسپریس پر نامعلوم افراد نے فائرنگ کردی جس کے باعث ڈرائیور جاں بحق ہوگیا۔
ذرائع کے مطابق آج صبح ساڑھے نو بجے ٹرین کوئٹہ سے روانہ ہوئی، جب ٹرین بولان میں پیروکنری کے علاقے سے گزری تو وہاں نامعلوم مسلح افراد نے فائرنگ کر دی جس کے نتیجے میں ڈرائیور جاں بحق زخمی ہو گیا جبکہ علاقے میں ابھی فائرنگ ہونے کی اطلاعات ہیں۔
سکیورٹی ذرائع کے مطابق ٹرین 8 نمبر ٹنل میں رکی ہے، ٹرین کو پٹری پر دھماکہ سے ڈی ریل کیا گیا۔
ریلوے حکام کے مطابق جعفر ایکسپریس 9 بوگیوں پر مشتمل ہے جس میں 500 کے قریب مسافر سوار ہیں، کنٹرولر ریلوے کا کہنا ہے کہ مسافروں اور عملے سے رابطے کی کوشش کی جا رہی ہے۔
سکیورٹی ذرائع کے مطابق یہ مچھ کی پہاڑیوں کا درمیانی علاقہ ہے جسے سکیورٹی فورسز نے گھیرے میں لے لیا ہے، علاقے میں موبائل سروس موجود نہیں۔
ترجمان بلوچستان حکومت نے کہا کہ واقعے کی نوعیت کا جائزہ لیا جا رہا ہے اور دہشت گردی کا شاخسانہ ہونے کا امکان ہے، تاہم تحقیقات جاری ہیں، سبی ہسپتال میں ایمرجنسی نافذ کردی گئی ہے جبکہ ایمبولینسز جائے وقوعہ کی جانب روانہ کردی گئی ہیں۔
آئی جی ریلوے رائے طاہر نے بتایا کہ جعفر ایکسپریس پر فائرنگ ہوئی ہے، ریسکیو ٹیمیں موقع پر پہنچ گئی ہیں، سکیورٹی فورسز بھی موقع پر موجود ہیں۔
رائے طاہر نے کہا کہ فائرنگ کے واقعہ کے حوالے سے تحقیقات جاری ہیں، تحقیقات کے بعد مزید حقائق سامنے آئیں گے۔
