اسلام آباد:(دنیا نیوز)فافن نے پنجاب میں آر ٹی آئی فریم ورک کو مضبوط بنانے کے حوالے سے پالیسی بریف جاری کر دیا۔
فافن پالیسی بریفنگ کے مطابق پنجاب شفافیت اور حق اطلاعات ایکٹ (PTRIA) 2013 کے نفاذ میں موجود خلا کو دور کرنے کے لیے اصلاحات کی جائیں، پنجاب اسمبلی، پنجاب انفارمیشن کمیشن اور سول سوسائٹی کے درمیان قریبی تعاون کیا جائے۔
پاکستان میں بڑھتی ہوئی غلط معلومات اکثر سیاسی انتشار کو ہوا دیتی ہیں، حق اطلاعات کے فریم ورک کو مضبوط بنانا عوامی اعتماد کی بحالی اور معلومات تک مساوی رسائی کے لیے ناگزیر ہے، PTRIA کو ایک ترقی پسند قانون سمجھا جاتا ہے، پی ٹی آر آئی اے کے نفاذ میں قانونی ابہام اور ادارہ جاتی کمزوریوں کے باعث چیلنجز ہیں، تقریباً 80 فیصد سرکاری محکمے اس قانونی تقاضے سے لاعلم ہیں کہ انہیں سالانہ کمپلائنس رپورٹس شائع کرنی ہیں۔
فافن نے بریفنگ میں بتایا کہ زیادہ تر عوامی ادارے معلومات کی درخواستوں کا مقررہ قانونی مدت کے اندر جواب دینے میں ناکام رہے، انفارمیشن کمشنرز کی تقرری اور برطرفی اور پی آئی سی کے بجٹ پر صوبائی حکومت کا صوابدیدی کنٹرول ہے۔
کام کے دن اور پبلک اداروں کی غیر واضح وضاحت، قانون کی من مانی تشریح کے خطرے کو بڑھاتی ہے، ریکارڈ رکھنے کے معیاری طریقہ کار کی عدم موجودگی ہے، ڈیجیٹل شکایات کے ناقص میکانزم قانون پر عملدرآمد کو کمزور کرتا ہے، درخواست دہندگان کے لیے ناکافی رازداری کے تحفظات بھی اس قانون کے نفاذ کو کمزور کر رہے ہیں (whistleblowers) کو تحفظ، اور گمنام آر ٹی آئی درخواستوں کی اجازت دی جائے۔
فافن نے اپنی بریفنگ میں یہ تجاویز بھی پیش کیں کہ پنجاب اسمبلی انفارمیشن کمشنرز کی تقرری کے لیے دو جماعتی کمیٹی تشکیل دے، کمیشن کی مالی خودمختاری کے لیے ایک آزاد فنڈ قائم کیا جائے، ریکارڈ مینجمنٹ، معائنہ کرنے، اور شفافیت کو ادارہ جاتی بنانے کے لیے پانچ سالہ سٹریٹجک پلان بنایا جائے، مؤثر آن لائن شکایتی نظام اور معیاری ڈیجیٹل انکشافات کا نظام بنایا جائے۔
