اسلام آباد: (دنیا نیوز) پاکستان تحریک انصاف کے رہنما اور قومی اسمبلی میں اپوزیشن لیڈر عمر ایوب نے کہا ہے کہ مسلم لیگ (ن) اور پاکستان پیپلز پارٹی کا ہمارے اندرونی معاملات سے کیا لینا دینا؟ عمران خان کی قیادت میں پارٹی متحد ہے۔
ڈسٹرکٹ کورٹ اسلام آباد کے باہر میڈیا سے گفتگو کرتے ہوئے عمر ایوب کا کہنا تھا کہ ضمانت منظور کرنے پر عدالت کا شکر گزار ہوں، میری اسوقت دیگر شہروں میں بھی کیسز کی سماعت ہے، میرے پاس اڑن طشتری بھی ہو تو بیک وقت 3 شہروں میں نہیں پہنچ سکتا۔
انہوں نے کہا کہ جوڈیشل سسٹم اور پولیس سسٹم میں ریفارمز کی ضرورت ہے، پرسوں اڈیالہ میں بانی پی ٹی آئی کو ملنے نہیں دیا گیا لوگوں کو گرفتار کیا گیا، پاکستان کو ضرور ہارڈ سٹیٹ ہونا چاہیے مگر بنیاد آئین اور قانون ہونی چاہیے، تشدد اور جبر سے کھوکھلی سٹیٹ بنتی ہے۔
یہ خبر بھی پڑھیں: 4 اکتوبر احتجاج پر درج مقدمات: عمر ایوب کی 9 کیسز میں ضمانت کنفرم
ان کا کہنا تھا کہ پی ٹی آئی میں گروپنگ کی بات ہوتی ہے، ن لیگ اور پی پی کا ہمارے اندرونی معاملات سے کیا لینا دینا؟ پی ٹی آئی چودھراہٹ والی پارٹی نہیں، سب برابر ہیں، بانی پی ٹی آئی سب کی سنتے ہیں، پارٹی عمران خان کی قیادت میں پاکستان متحد ہے۔
اپوزیشن لیڈر نے کہا کہ معدنیات بل پاس کرنا نہ کرنا صوبائی اسمبلی اور صوبائی حکومت کا معاملہ ہے، گرینڈ الائنس کے معاملے پر ہماری جدوجہد جاری ہے، وزیر اعلیٰ بلوچستان کو کہوں گا ہم سب کو بلائیں، انویسمنٹ کا بنیادی اصول ہے اس ملک میں آئین اور قانون دیکھا جاتا ہے۔
عمر ایوب کا کہنا تھا کہ اعظم سواتی معزز بزرگ ہیں، میں میٹنگ میں نہیں تھا، انہوں نے جو کہا سچ ہوگا، بانی پی ٹی آئی ودیگر سیاسی قیدی ہیں، حکومت خود کہتی ہے کہ بانی پی ٹی آئی معافی مانگیں اس کا مطلب سیاسی کیس ہے۔
