لاہور:(دنیانیوز) قائد مسلم لیگ ن میاں نواز شریف نے کہا ہے کہ ملکی دفاع کے عظیم مقصد کے لیے تمام جماعتوں کا متحد ہونا اچھی روایت ہے۔
صوبائی دارالحکومت جاتی امرا میں سینیٹر عرفان صدیقی سے ملاقات کے دوران گفتگو کرتے ہوئے نوازشر یف کا کہنا تھا کہ ملکی دفاع اور قومی سلامتی کے لیے پارلیمنٹ میں موجود تمام سیاسی جماعتوں کا یک زبان ہو کر آواز اٹھانا نہایت خوش آئند ہے۔
انہوں نے کہا کہ پارلیمنٹیرینز کے اس کردار سے قومی یکجہتی کو فروغ ملے گا اور عوام میں بھی اتفاق و اتحاد کی فضا پیدا ہو گی۔
ملاقات کے دوران عرفان صدیقی نے اپنی جماعت کے سربراہ نواز شریف کو سینیٹ میں مسلم لیگ (ن) پارلیمانی پارٹی کی کارکردگی سے آگاہ کیا، اپنی گفتگو میں انہوں نے ملکی دفاع کے عزم کے متفقہ اظہار پر مشتمل قرارداد کا بھی ذکر کیا اور بتایا قرار داد کی تیاری اور تائید میں تمام جماعتوں نے حصہ لیا۔
آخر میں قائد مسلم لیگ ن کا مزید کہنا تھا کہ اختلاف رائے جمہوریت کا حسن ہے، ملکی دفاع کے عظیم مقصد کے لیے ہر طرح کے اختلافات کو ایک طرف رکھ دینا اچھی روایت ہے۔
