اسلام آباد ، نئی دہلی : (دنیا نیوز) پاک بھارت جنگ بندی کے بعد فضائی آپریشن معمول بحال ہونا شروع ہو گئے ہیں، پاکستان کے تمام ایئرپورٹس پر معمول کے مطابق آپریشن بحال ہے جبکہ بھارت نے بھی 32 ہوائی اڈے کھولنے کا فیصلہ کر لیا ہے۔
متحدہ عرب امارات کی پروازوں نے بھی پاکستان کیلئے اڑان بھرنا شروع کر دی ہے جبکہ سعودی ایئرلائن کے پاکستان کے لیے آپریشن کل سے شروع ہونے کی توقع ہے۔
ایئرپورٹ حکام کے مطابق لاہور، سیالکوٹ، کراچی، پشاور اور اسلام آباد انٹرنیشنل ایئرپورٹ پر تمام آپریشنز معمول کے مطابق ہیں تاہم فلائٹ آپریشن کی عارضی بندش سے کچھ پروازوں کے شیڈول متاثر ہوئے، مسافر ایئرپورٹ پر آنے سے پہلے ایئرلائنز کی ہیلپ لائن سے وقت کی تصدیق کر لیں۔
بھارت کا 32 ہوائی اڈے کھولنے کا فیصلہ
ادھر بھارت نے کشیدگی کے باعث عارضی طور پر بند 32 ہوائی اڈے کھولنے کا فیصلہ کیا ہے، ان میں لداخ ، دھرم شالا، جموں ، سرینگر ، امرتسر اور چندی گڑھ سمیت مختلف شہروں کے اڈے شامل ہیں۔
واضح رہے کہ بھارت کے بڑے شہروں کے 32 ہوائی اڈے بند ہونے کے سبب آج بھی 444 پروازیں منسوخ کی گئی ہیں۔
بھارت کیلئے پاکستانی حدود کی بندش کا 19 واں روز
دوسری طرف بھارتی پروازوں کیلئے پاکستانی فضائی حدود کی بندش کو 19 روز ہو گئے، 18 روز کے دوران 2 ہزار بھارتی پروازیں متاثر ہوئی ہیں اور بھارتی ایئرلائنز کو 400 کروڑ بھارتی روپے سے زائد کا نقصان ہوچکا ہے۔
پاکستان کی فضائی حدود کی بندش سے بھارتی طیاروں کو آدھے بھارت سے ہوکر بحیرہ عرب سے جانا پڑ رہا ہے، بھارتی ایرلائنز کی لمبے روٹس سے گزرنے پر فیول اور دیگر آپریشنل اخراجات دوگنا ہونے پر مالی نقصان نے چیخیں نکال دی ہیں۔
