اسلام آباد : (دنیا نیوز) وفاقی دارالحکومت کے سیکٹر ای الیون میں زمین کی خرد برد کے حوالے سے نیب کے خلاف کیس کی سماعت کرنے والا بنچ تبدیل کردیا گیا۔
بنچ کی تبدیلی پر ڈویژن بنچ کا اہم حکم آگیا، 2 رکنی بنچ کے آرڈر کے بعد قائم مقام چیف جسٹس کی ہدایت پر نیا ججز روسٹر جاری کر دیا گیا، ججز کے نئے ڈیوٹی روسٹر میں جسٹس محسن اختر کیانی کا ڈویژن بنچ ہی ختم کردیا گیا۔
ڈویژن بنچ نے حکم دیا ہے کہ جسٹس محسن اختر کیانی اور جسٹس سردار اعجاز اسحاق کے بنچ میں کیس مقرر کیا جائے، اب آئندہ ہفتے روسٹر میں جسٹس محسن اختر کیانی کا ڈویژن بنچ ہی موجود نہیں۔
نیب کے خلاف کیس جسٹس محسن اختر کیانی اور جسٹس سردار اعجاز اسحاق کے ڈویژن بنچ میں زیر سماعت تھا، 28 اپریل کو سماعت کے روز بنچ کی عدم دستیابی کے باعث کیس کی کاز لسٹ منسوخ کی گئی تھی۔
22 مئی کے لیے کیس جسٹس محسن کیانی اور جسٹس سردار اعجاز اسحاق کے پاس مقرر کیا گیا، 28 اپریل کو ہی قائم مقام چیف جسٹس کی ہدایت پر نیا ججز روسٹر جاری ہوا تھا، نئے روسٹر میں جسٹس محسن اختر کیانی کے ساتھ جسٹس ثمن رفعت کا بنچ بنا دیا گیا۔
8 مئی کو سیکٹر ای الیون میں زمین کی خورد برد کے کیس کی متفرق درخواست نئے بینچ کے سامنے مقرر ہوئی، وکیل نے بتایا کہ پہلے یہ کیس جسٹس محسن کیانی اور جسٹس سردار اعجاز اسحاق سن چکے ہیں، جسٹس محسن اختر کیانی اور جسٹس ثمن رفعت نے کیس دوبارہ پرانے بنچ میں مقرر کرنے کے لیے آرڈر جاری کر دیا۔
