نارووال:(دنیا نیوز) وفاقی وزیر پلاننگ اینڈ ڈیویلپمنٹ احسن اقبال نے کہا ہے کہ حنا ارشد ورائچ کو ضمنی الیکشن جیتنے پر مبارکباد پیش کرتا ہوں۔
پنجاب کے علاقے نارووال میں میڈیا سے گفتگو کرتے ہوئے احسن اقبال کا کہنا تھا کہ مسلم ن کی کامیابی دراصل اس بات کا ثبوت ہے، پاکستان کے عوام مسلم لیگ ن کی قیادت پر پاکستان کی ترقی دفاع کیلئے بھرپور اعتماد کر رہے ہیں، اس الیکشن میں پی ٹی آئی کی شکست اس بات کا ثبوت ہے۔
انہوں نے کہا کہ پاکستان کی عوام کو منفی تخریبی سیاست سے کوئی دلچسپی نہیں ہے، وہ چاہتے ہیں ملک امن استحکام کا سفر جاری رکھے ، پاکستان نے جس طرح بھارت کا غرور 3 دن میں خاک میں ملایا ہے، پاکستانی قوم کا بہادر مسلح افواج وزیراعظم شہباز شریف پر اعتماد مزید بڑھا دیا ہے۔
وفاقی وزیر کا کہنا تھا کہ عوام کی محبت کا عملی ثبوت آج سیالکوٹ کا الیکشن ہے، مسلم لیگ ن ہی پاکستان کی ترقی کی جماعت ہے، پاکستان کے عوام سمجھدار ہو گئے ہیں، سوشل میڈیا کا جادو تھا جس سے لوگوں کو ورغلایا گیا۔
احسن اقبال کا مزید کہنا تھا کہ پی ٹی آئی کے سوشل میڈیا نے کچھ دیر کے لئے لوگوں کو گمراہ کیا لوگ باخبر ہو گئے ہیں، ہندوستان کا میڈیا اور پی ٹی آئی کا سوشل میڈیا یہ دونوں آپس میں کزن ہیں۔
