مستونگ: (دنیا نیوز) مستونگ میں بلوچستان کانسٹیبلری کے افسر کی گاڑی پر حملے میں قائم مقام ڈی ایس پی اور ایک اہلکار شہید جبکہ 3 زخمی ہوگئے۔
ترجمان حکومت بلوچستان شاہد رند نے بتایا کہ فائرنگ کا واقعہ مستونگ میں قومی شاہراہ پر پیش آیا، فائرنگ کے نتیجے میں قائم مقام ڈی ایس پی اور ایک اہلکار شہید جبکہ 3 زخمی ہوگئے، جنہیں فوری طبی امداد کے لیے ہسپتال منتقل کردیا گیا ہے۔
شاہد رند نے بتایا کہ ابتدائی اطلاعات کے مطابق حملے میں قائم مقام ڈی ایس پی کی گاڑی کو نشانہ بنایا گیا ہے، سکیورٹی فورسز فوری جائے وقوعہ پر پہنچ گئیں جبکہ علاقے کی ناکہ بندی کرکے ملزمان کی تلاش شروع کردی گئی۔
وزیراعظم شہبازشریف کا اظہارِ افسوس
وزیراعظم محمد شہباز شریف نے بلوچستان کے ضلع مستونگ میں پولیس موبائل پر دہشت گرد حملے میں پولیس اہلکاروں کی شہادت پر اظہارِ افسوس کرتے ہوئے شہید کے لیے دعائے مغفرت اور لواحقین کے لیے صبر و استقامت کی دعا کی۔
وزیراعظم نے زخمیوں کو ترجیحی بنیادوں پر فوری طبی امداد فراہم کرنے کی ہدایت کرتے ہوئے کہا کہ ملکی سالمیت کو نقصان پہنچانے والے دہشت گردوں کے مذموم عزائم کو خاک میں ملا دیں گے، حکومت اور سکیورٹی فورسز ملک سے دہشتگردی کے مکمل خاتمے کے لیے پر عزم ہیں۔
