لاہور: (دنیا نیوز) لاہور ہائیکورٹ نے شہری مختار احمد کو ممکنہ پولیس مقابلے میں مارنے سے روکنے اور بازیاب کرنے کے متعلق درخواست کو غیر ضروری قرار دیتے ہوئے نمٹا دیا۔
چیف جسٹس لاہور ہائیکورٹ نے درخواست گزار الفت بی بی کی جانب سے دائر کردہ درخواست پر سماعت کی۔
درخواست میں مؤقف اختیار کیا گیا کہ درخواست گزار کے شوہر مختار احمد کو سی سی ڈی سرگودھا پولیس نے اُس وقت گرفتار کیا جب وہ دونوں جنازے میں شرکت کے لیے جا رہے تھے۔
درخواست گزار نے عدالت کو بتایا کہ مختار احمد مختلف مقدمات میں ضمانت پر تھا، تاہم پولیس نے اس کے باوجود اسے حراست میں لے لیا، خدشہ ہے کہ مختار احمد کو ممکنہ پولیس مقابلے میں قتل کیا جا سکتا ہے۔
الفت بی بی نے عدالت سے استدعا کی کہ سی سی ڈی پولیس کو ممکنہ جعلی پولیس مقابلے سے روکا جائے اور اس کے شوہر کی فوری بازیابی کا حکم دیا جائے۔
سی سی ڈی کے ایس پی ناصر عباس نے عدالت کو آگاہ کیا کہ مختار احمد کے خلاف مختلف تھانوں میں مجموعی طور پر 26 مقدمات درج ہیں اور وہ اس وقت جوڈیشل ریمانڈ پر ہے۔
عدالت نے فریقین کے دلائل سننے کے بعد ریمارکس دیے کہ چونکہ متعلقہ شخص جوڈیشل ریمانڈ پر ہے اس لیے بازیابی کی درخواست غیر ضروری ہے، عدالت نے درخواست کو نمٹا دیا۔
