طاقتور لوگ جب وسائل پر قبضہ کریں گے تو غم و غصہ پیدا ہوگا: حافظ نعیم الرحمان

لاہور: (دنیا نیوز) امیر جماعت اسلامی حافظ نعیم الرحمان نے کہا کہ سازشیں کرنے والا حکمران طبقہ ہے، سرمایہ داروں کے ساتھھ مل کر لوٹ مار کا سلسلہ جاری ہے، طاقتور لوگ جب وسائل پر قبضہ کریں گے تو غم و غصہ تو پیدا ہوگا۔

لاہور پریس کلب کے باہر جماعت اسلامی کے دھرنے کے دوسرے روز شرکا سے خطاب کرتے ہوئے امیر جماعت اسلامی حافظ نعیم الرحمان نے کہا کہ لانگ مارچ میں شریک افراد کو خراج تحسین پیش کرتا ہوں، لانگ مارچ کے شرکا کا تمام شہروں میں شانداراستقبال ہوا۔

حافظ نعیم الرحمان نے کہا کہ مختلف شہروں سے ہوتے ہوئے شرکا لاہور پہنچے ہیں، پنجاب، خیبرپختونخوا، سندھ بلوچ عوام کے ساتھ ہے، پورا پاکستان بلوچستان کے ساتھ ہے، جماعت اسلامی سب کے حقوق کیلئے بات کرتی ہے، ہمیں معلوم ہے پنجاب، بلوچستان کی حکومت فارم 47 والی ہے۔

امیر جماعت اسلامی کا کہنا تھا کہ عدل کے نظام، انصاف کے لیے پاکستان بنایا گیا تھا، پولیس کو راستے سے ہٹانا ہمارے لیے کوئی مسئلہ نہیں تھا، ہم لڑنا نہیں چاہتے، بلوچستان کے مسائل حل کرنا چاہتے ہیں۔

حافظ نعیم الرحمان نے کہا کہ اگر کمیٹی پر آج سے کام شروع نہیں ہوا تو پھر میں لانگ مارچ کا آغاز کروں گا، پھر ہم دیکھیں گے کون ہمارا راستہ روکتا ہے، سیدھے طریقے سے آج ہی مذاکرات شروع کریں، بلوچ، پشتونوں کوعزت دو، بلوچ نوجوانوں کے زخموں پر مرہم رکھنا ہوگا۔

انہوں نے کہا کہ بلوچستان کے لاپتا نوجوانوں کے حکومت شواہد پیش کرے، لاپتا کرنا کسی صورت قابل قبول نہیں ہے، کمیشن میں لاپتا نوجوانوں کو پیش کیا جائے، اگر کوئی مجرم یا ملک دشمن ہے تو عدالتوں میں پیش کرو۔

امیر جماعت اسلامی نے کہا کہ غداری کے سرٹیفکیٹ بانٹنا چھوڑ دو اس طرح ریاستیں نہیں چلتیں، معدنیات پر پہلا حق مقامی لوگوں کا ہے، تمام لوگوں کے حقوق کا خیال رکھا جائے، بلوچستان کےنوجوانوں کو ان کے حقوق دیئے جائیں۔

حافظ نعیم الرحمان نے کہا کہ پاک، ایران گیس پائپ لائن منصوبے پر عملدرآمد کیا جائے، امریکا سے ڈر کی وجہ سے ایران گیس پائپ لائن منصوبے کو مکمل نہیں کر رہے، ہمسایہ ممالک کے ساتھ بارڈر کے معاملات مذاکرات سے طے کئے جائیں۔

انہوں نے کہا کہ بلوچستان کو پانی اور روزگار دو، اگر لوگوں کو طاقت سے ہینڈل کرو گے تو پھر بغاوتیں پھوٹتی رہیں گی، لاہور میں بلوچوں کا مقدمہ پیش ہو رہا ہے، بلوچ عوام کی جدوجہد کے ساتھ ہے، پورے پاکستان کو اس مافیا سے نجات دلائیں گے، اب عوام اکٹھے اور یہ مافیا تقسیم ہوگا۔