پشاور: (دنیا نیوز) پشاور ہائیکورٹ نے کوہستان سکینڈل میں نیب کو نامزد ملزم سید مہتاب شاہ کی گرفتاری سے روک دیا۔
پشاور ہائیکورٹ کے جسٹس سید ارشد علی اور جسٹس فرح جمشید نے نیب نوٹس کے خلاف سید مہتاب شاہ کی دائر درخواست پر سماعت کی، عدالت نے نیب کو نوٹس جاری کرتے ہوئے جواب طلب کر لیا۔
وکیل درخواست گزار سید قیصر علی شاہ ایڈووکیٹ نے دلائل میں کہا کہ درخواست گزار پراپرٹی ڈیلر ہے اور نیب نے نوٹس جاری کیا ہے، نیب نے پراپرٹیز بھی سیل کی ہیں۔
جسٹس سید ارشد علی نے استفسار کیا کہ نیب نے وارنٹ جاری کیا ہے؟ جس پر سپیشل پراسیکیوٹر نیب ارباب کلیم اللہ نے بتایا کہ نیب نے نوٹس جاری کیا ہے، وارنٹ ابھی تک جاری نہیں کیا۔
قیصر علی شاہ ایڈووکیٹ نے کہا کہ درخواست گزار نیب کے ساتھ تعاون کیلئے تیار ہے لہٰذا نیب درخواست گزار کو گرفتار نہ کریں۔
عدالت نے ہدایت کی کہ نیب آپ کو بلائے تو آپ جا کر تفتیش میں تعاون کریں، آپ کو گرفتار نہیں کریں گے۔
پشاور ہائیکورٹ نے نیب کو آئندہ سماعت تک جواب جمع کرانے کی ہدایت کرتے ہوئے سماعت 20 اگست تک ملتوی کر دی۔
