راولپنڈی: (دنیا نیوز)یومِ آزادی اور معرکہ حق کی روح کو خراج تحسین پیش کرنے کیلئے پاک فوج کے شعبہ تعلقات عامہ (آئی ایس پی آر) نے نیا ملی نغمہ ’جان سے پیارا پاکستان‘ جاری کر دیا۔
اس نغمے میں نہ صرف پاکستان سے بے پناہ محبت کو شاعرانہ انداز میں سمویا گیا ہے، بلکہ ہر پاکستانی چاہے وہ سپاہی ہو یا کسان، مزدور ہو یا لوہار، کو وطن کی ترقی و سلامتی کا ستون قرار دیا گیا ہے۔
نغمے کے بول ’اٹھے قدم جو غیر کے، ہم دھول چٹا دیں گے‘ دشمن کو دوٹوک پیغام دیتے ہیں کہ پاکستان کی سرزمین پر کسی بھی جارحیت کا منہ توڑ جواب دیا جائے گا، ملی نغمے کا ایک اہم پہلو یہ بھی ہے کہ اس میں پاکستان کی اصل پہچان مذہبی ہم آہنگی کو خوبصورت انداز میں اجاگر کیا گیا ہے۔
بول ’اس قوم میں شانہ ہیں کھڑے ہندو اور سکھ، عیسائی بھی‘ وطن کے تمام مذاہب کے افراد کو ایک اکائی کے طور پر پیش کرتے ہیں، جو اتحاد اور بھائی چارے کی علامت ہے، یہ نغمہ نہ صرف فوج کے عزم، حوصلے اور تیاری کو اُجاگر کرتا ہے، بلکہ عوامی عزم و وفا کو بھی نمایاں کرتا ہے۔
نغمے کے بول ’ہر شہری نے وطن سے وفا کی قسم کھائی ہے‘ قومی وحدت اور قربانی کے جذبے کی عکاسی کرتے ہیں۔
’جان سے پیارا پاکستان‘ محض ایک ترانہ نہیں بلکہ ایک جذبہ ہے، ایسا جذبہ جو ہر پاکستانی کے دل میں بیدار ہوتا ہے جب بات وطن، اس کے تحفظ اور اس کی عزت کی آتی ہے، یہ نغمہ یومِ آزادی 2025 کو ایک نئی روح بخشتا ہے، اور عوامی جوش و جذبے کو تازہ کرتا ہے۔
