لاہور: (دنیا نیوز) وزیراعلیٰ مریم نواز شریف نے پاکستان کی پہلی اربن الیکٹرک ٹرین "سپر اٹانومس ریپڈ ٹرانزٹ" میں تجرباتی سفر کیا۔
وزیراعلیٰ پنجاب نے "سپر اٹانومس ریپڈ ٹرانزٹ" میں علی ٹاؤن سے مسلم ٹاؤن تک روڈ ٹیسٹ خود مانیٹر کیا، مریم نواز نے ایس آر ٹی کا معائنہ کیا اور موجود سہولتوں کا جائزہ لیا۔
وزیر ٹرانسپورٹ بلال اکبر نے وزیراعلیٰ پنجاب کو ایس آر ٹی کے بارے میں تفصیلی بریفنگ دی، مریم نواز نے ایس آر ٹی کے روڈ ٹیسٹ ڈرائیو کا جائزہ لیا، اور عام ٹریفک کے درمیان ایس آر ٹی کی رننگ چیک کی۔
رائے ونڈ روڈ اور کینال روڈ پر عوام ایس آر ٹی کو دیکھ کر خوشی کا اظہار کرتے رہے۔
"سپر اٹانومس ریپڈ ٹرانزٹ" ترکی، چین، ابوظہبی اور دیگر ممالک میں کامیابی سے چلائی جا رہی ہے، الیکٹرک ٹرین میں تین بوگیاں لگائی گئی ہیں جبکہ چار کی گنجائش ہے، نورنکو انٹرنیشنل کی جدید ترین ایس آر ٹی میں 320 مسافروں کی گنجائش ہے۔
پہلی مکمل ای ٹرین "سپر اٹانومس ریپڈ ٹرانزٹ" ایک دفعہ چارج کے بعد 40 کلومیٹر سفر طے کر سکتی ہے، "سپر اٹانومس ریپڈ ٹرانزٹ" میں ایئر کنڈیشنڈ اور دیگر سہولیات میسر ہوں گی۔
وزیراعلیٰ مریم نواز شریف کا کہنا ہے کہ "سپر اٹانومس ریپڈ ٹرانزٹ" سے ماحولیاتی آلودگی میں کمی اور ٹریفک میں بہتری آئے گی، پنجاب کے عوام کے لئے اب ہر روز خوشی کی خبر منتظر ہوتی ہے، ایس آر ٹی چلنے سے لاہور کی خوبصورتی دوبالا ہوگی۔
مریم نواز نے مزید کہا کہ گوجرانوالہ اور فیصل آباد میں بھی ایس آر ٹی کی خوش خبری آ رہی ہے۔
