راولپنڈی :(دنیا نیوز) فیلڈ مارشل سید عاصم منیر نے کہا ہے کہ پاکستان واضح کرچکا ہے کہ کسی بھی بھارتی جارحیت کا بھر پور جواب دیا جائے گا۔
دورہ امریکا کے دوران پاکستانی کمیونٹی سے خطاب کرتے ہوئے فیلڈ مارشل سید عاصم منیرکا کہنا تھا کہ امریکا میں مقیم پاکستانیوں سے خطاب میرے لیے اعزاز کی بات ہے، اوورسیز پاکستانی وقار کا سرچشمہ اور دیگر پاکستانیوں کی طرح پر جوش ہیں۔
انہوں نے کہا کہ اوورسیز پاکستانی ’برین ڈرین نہیں بلکہ برین گین‘ ہیں، ناگہانی آفات کی صورت میں بھی تارکین وطن سب سے پہلے لبیک کی کال دیتے ہیں، پاکستان کی خوش حالی دنیا بھر میں بسنے والے پاکستانیوں سے وابستہ ہے، تارکین وطن کی پاکستان سے وابستگی کھلی حقیقت ہے۔
فیلڈ مارشل کا کہنا تھا کہ بھارت نے خود کو ’وشوا گرو‘ بنا کر پیش کرنا چاہتا ہے ، عملی طور پر ایسا کچھ بھی نہیں، بھارتی ایجنسی ’را‘ کی دہشت گرد سرگرمیوں سے پوری دنیا کو تشویشں ہے،کینیڈا میں سکھ رہنما کا قتل پاکستان میں کلبھوشن یادیو کی موجودہ مثالیں ہیں۔
سید عاصم منیر نے کہا کہ بھارت نے بہانہ بنا کر پاکستان کی خود مختاری کی سنگین خلاف ورزی کی ، بھارت نے جارحیت سے معصوم شہریوں کو شہید کیا،پاکستان نے بھارت کی دوغلی پالیسی کے خلاف کامیاب سفارتی جنگ لڑی۔
یہ بھی پڑھیں:اوورسیز پاکستانی روشن مستقبل پر اعتماد اور سرمایہ کاری میں کردار ادا کریں: فیلڈ مارشل
ان کا کہنا تھا کہ کسی بھی غلطی کی وجہ سے تصادم بہت بڑی غلطی ہو گی، بھارت کی جارحیت نے پورے خطے کو خطرناک جنگ کے دہانے پر کھڑا کیا،ٹرمپ کا مشکور ہوں جس کی اسٹریٹجک لیڈر شب نے صرف پاکستان نہیں بلکہ پوری دنیا میں جنگوں کورکوایا۔
فیلڈ مارشل نے کہا کہ قائد اعظم نے کہا تھا کشمیر پاکستان کی شہ رگ ہے، مقبوضہ کشمیر بھارت کا کوئی اندرونی معاملہ نہیں بلکہ عالمی نامکمل ایجنڈا ہے، کشمیریوں کے حق خود ارادیت کی حمایت کرتے رہیں گے، مقبوصہ کشمیر پر سلامتی کونسل کی قراردادیں موجود ہیں، ان کی حمایت جاری رکھیں گے، پاکستان امن کا خواہاں اور بھارت خطے میں عدم استحکام پر بضد ہے۔
سید عاصم منیر کا کہنا تھا کہ پاکستان واضح کرچکا ہے کہ کسی بھی جارحیت کا بھر پور جواب دیا جائے گا جب کہ افغانستان میں فتنہ الخوارج سمیت کئی دہشت گرد گروہ شرپسند سرگرمیوں میں ملوث ہے، ہمیں دہشت گردوں سے کوئی ہمدردی نہیں۔
انہوں نے کہا کہ سوشل میڈیا طاقتور ذریعہ ابلاع بن چکا ہے، ہمارے دشمن سوشل میڈیا کے غلط استعمال سے ہمارے خلاف منفی پروپیگنڈا کررہے ہیں اور اس کے ذریعے افراتفری پھیلاتے ہیں ،جب کہ غزہ میں جاری نسل کشی بدترین المیہ ہے۔
فیلڈ مارشل کا مزید کہنا تھا کہ نئی نسل کی سوچ ، تعلقات اور ترجیحات مختلف ہیں جنہیں سمجھنے کی ضرورت ہے، آئیے ہم اپنے آباؤ اجداد کی میراث کو نئے جذبے سے آ گے بڑھائیں، امریکا میں یہ میرا دوسرا دورہ ہے جو پاک امریکا تعلقات کی نئی جہت کی علامت ہے ، ان دوروں کا مقصد تعمیری تعلقات کو فروغ دینا ہے۔
