اسلام آباد: (دنیا نیوز) صدر مملکت آصف علی زرداری نے ملک گیر مون سون شجر کاری مہم کے آغاز پر اپنے پیغام میں کہا ہے کہ پاکستان کو موسمیاتی تبدیلی کے شدید خطرات لاحق ہیں اور اس تناظر میں شجر کاری مہم پاکستان کے محفوظ مستقبل کی ضمانت ہے۔
صدرِ مملکت نے بتایا کہ اس سال اگست سے اکتوبر تک پورے ملک میں 4 کروڑ 10 لاکھ سے زائد پودے لگائے جائیں گے، درخت لگانا ہر شہری کا قومی فریضہ ہے کیونکہ درخت ماحول کے لیے زندگی کی علامت اور موسمیاتی تبدیلی کے خلاف سب سے مضبوط ڈھال ہیں۔
انہوں نے کہا ہے کہ جنگلات کی کٹائی، درجہ حرارت میں اضافہ اور بار بار آنے والے سیلاب لاکھوں زندگیاں متاثر کر رہے ہیں، ایسے میں قوم کی ترقی جنگلات اور قدرتی ماحول کے تحفظ پر منحصر ہے۔
صدرِ مملکت نے عوام سے اپیل کی کہ وہ سرسبز، صاف اور خوشحال پاکستان کے لیے زیادہ سے زیادہ پودے لگائیں۔ ان کے مطابق ہر لگایا گیا درخت آئندہ نسلوں کے لیے زندگی کا ذریعہ اور آفات کے خلاف ایک ڈھال ہے۔
آصف علی زرداری نے کہا ہے کہ حالیہ بارشوں اور سیلاب نے ملک کے مختلف حصوں میں تباہی مچائی ہے لہٰذا ہمیں فیصلہ کن انداز میں زیادہ سے زیادہ درخت لگانے اور گرین پاکستان پروگرام کو کامیاب بنانے کی ضرورت ہے۔
صدر مملکت نے زور دیا کہ نوجوان شجر کاری مہم کی قیادت کریں اور تبدیلی کے سفیر بنیں جبکہ کسان درخت لگا کر اپنی فصلوں اور ماحول کو محفوظ بنا سکتے ہیں، انہوں نے میڈیا، سول سوسائٹی، کمیونٹی رہنماؤں اور علما سے اپیل کی کہ وہ عوام کو اس قومی فریضے کی حمایت کے لیے متحرک کریں۔
