کوئٹہ:(دنیا نیوز) ترجمان بلوچستان حکومت شاہد رند نے کہا ہے کوئٹہ سے حالیہ اہم گرفتاری کے بعد تحقیقات کا دائرہ وسیع کردیا گیا۔
بلوچستان کے دارالحکومت سے جاری اپنے ایک بیان میں شاہد رند کا کہنا تھا کہ حکومت کے مطابق کچھ ٹارگٹ کلرز کے حوالے سے ایک لیڈ ملی تھی، ایک سے زائد مقامات پر چھاپے مار کر مشتبہ افراد کو ہراست میں لیا گیا۔
انہوں نے بتایا کہ ایک چھاپے کے دوران ضمیر ایڈووکیٹ بھی مشتبہ افراد کے ساتھ تحویل میں آئے،ابتدائی تحقیقات کے بعد ضمیر ایڈووکیٹ کو رہا کردیا گیا، بلوچستان میں قیام امن کے لئے کارروائیاں جاری ہیں، واضح کرچکے ہیں۔
ترجمان بلوچستان حکومت کا کہنا تھا کہ سکیورٹی فورسز گرے ایریاز میں آپریٹ کر رہی ہیں جہاں دوست اور دشمن کی پہچان مشکل عمل ہے، پائیدار قیامِ امن کے لئے اجتماعی کوششوں کی ضرورت ہے۔
شاند رند نے مزید کہا کہ اس ضمن میں عوام کا تعاون ناگزیر ہے، کسی بے قصور کے ساتھ ناانصافی نہیں ہوگی، پوچھ گچھ ایک قانونی عمل ہے۔
