کوئٹہ: (دنیا نیوز) بلوچستان میں 24 گھنٹوں کے دوران زیارت، خضدار، سوراب، جھل مگسی، ہرنائی اور قلات میں بارش ہوئی جس سے دو افراد جاں بحق ہو گئے ہیں۔
پی ڈی ایم اے کے مطابق موسلادھار بارشوں سے جانی اور مالی نقصانات بھی رپورٹ ہوئے، ہرنائی میں چھت گرنے سے خاتون اور بچے سمیت 2 افراد جاں بحق ہوئے، چھت گرنے سے ایک خاتون زخمی بھی ہوئی۔
یہ خبر بھی پڑھیں: مون سون کے نئے سپیل کا آغاز، صوابی میں بادل پھٹنے سے تباہی، 15 افراد جاں بحق
ہرنائی کے علاقے گاچینہ میں 3 افراد سیلابی ریلے میں بہہ گئے، 2 افراد کو ریسکیو کرلیا گیا، 1 بچے کو بچانے کے لیےآپریشن جاری ہے، سوراب کے مختلف علاقوں میں 115 سے زائد گھروں کو نقصان پہنچا ہے۔
نیشنل ہائی وے اتھارٹی کے مطابق کچھی میں موسلادھار بارش سے کوئٹہ سبی شاہراہ ٹریفک کے لیے بند ہو گئی، بولان ندی میں سیلابی ریلے کے باعث بی بی نانی پل کو نقصان پہنچا، شہری پل کی بحالی تک غیر ضروری سفر سے گریز کریں۔
ندی نالوں میں سیلاب کے پیش نظر تمام محکموں کو الرٹ جاری کردیا گیا، ڈیرہ بگٹی میں بارش کے دوران ایف سی کے اہلکار عوام کو درپیش مشکلات کے وقت عوام کے ساتھ شانہ بشانہ موجود رہے اور ہر ممکن مدد فراہم کی۔
اس کے علاوہ بلوچستان کے شہروں خضدار، آواران، لسبیلہ، پسنی، گوادر، پنجگور، کیچ، شیرانی، پشین، قلعہ عبداللہ، ڈیرہ بگٹی، نصیر آباد، قلات، بارکھان، قلعہ سیف اللہ، ژوب، موسیٰ خیل، مستونگ، لورا لائی اور کوہلو میں بھی بارش کا امکان ظاہر کیا گیا ہے۔
