ملتان: (دنیا نیوز) وسطی پنجاب کے بعد جنوبی پنجاب سیلابی ریلوں کا نشانہ بن گیا، ملتان میں شیر شاہ بند میں شگاف ڈالنے کی تیاریاں کر لی گئیں۔
رنگ پور میں سیلابی ریلا مظفر گڑھ ملتان روڈ سے گزرنے لگا، پانی کے تیز بہاؤ کے باعث ٹریفک کو روک دیا گیا، گاڑیوں کی قطاریں لگ گئیں، سیلابی پانی روڈ کراس کر کے سپر بند سے ٹکرا گیا، سیلابی پانی سے روڈ کا کٹاؤ بھی جاری ہے، پانی اطراف کی آبادیوں میں بھی داخل ہوگیا، شہریوں کی نقل مکانی جاری رہی۔
سیت پور سے بڑے پیمانے پر مکینوں کا انخلا ہوگیا، کہروڑ پکا میں موچیاں والا بند ٹوٹ گیا، سیلابی پانی نے تہس نہس کردیا، متعدد دیہات زیر آب آگئے، وسیع رقبے پر کاشت کپاس، مکئی اور تل کی فصلیں دریا برد ہوگئیں، لیاقت پور میں ریسکیو آپریشن کے دوران 2 کشتیاں الٹ گئیں۔
حادثے میں 3 بچوں سمیت 6 افراد جاں بحق ہوگئے، تمام افراد کی لاشیں نکال لی گئیں، متعد د افراد کو ریسکیو کرلیا گیا، وزیراعلیٰ مریم نوا ز نے جلالپور میں سیلاب متاثرین کو ٹینٹ فراہم کرنے کی ہدایت کردی۔
