راولپنڈی: (دنیا نیوز) 10 ستمبر 1965 کو جنگ کے دسویں روز پاکستانی افواج نے بھرپور جوابی کارروائی کرتے ہوئے بھارتی فوج کو قصور سیکٹر سے پسپا کر دیا، جموں سے سیالکوٹ کی طرف پیش قدمی کرنے کی کوشش کرنے والے بھارتی دستوں کو بھی بھاری جانی و مالی نقصان اٹھانا پڑا۔
پاک فضائیہ نے دوارکا اور جام نگر کے نیول و ایئر بیس پر کاری ضرب لگائی جس پر بھارتی بحریہ نے اپنی فضائیہ کی شرمناک ناکامی پر شدید غصے کا اظہار کیا، لاہور سیکٹر میں پاکستانی فوج نے چھوٹے ہتھیاروں سے فائر کرکے بھارت کے دو جنگی طیارے مار گرائے۔
سیالکوٹ کے محاذ پر پاکستانی فوج نے بھارتی فوج کے مزید 7 سینچورین ٹینک تباہ کیے جس کے بعد اس محاذ پر بھارتی ٹینکوں کی تباہی کی تعداد 42 تک پہنچ گئی، ادھر دراس سیکٹر میں مجاہدین نے مرال آباد کے مقام پر بھارتی فوج کے مضبوط ٹھکانے نیست و نابود کیے۔
پاک بحریہ کی برتری کے باعث بحیرہ عرب میں بھارتی بحریہ کی آزادانہ سرگرمیاں مکمل طور پر ختم ہو گئیں، اسی دوران پاکستانی لڑاکا طیاروں نے لاہور کی فضائی حدود میں بھارتی فوج کی مدد کو آنے والے ایک بھارتی جیٹ کو بھی مار گرایا۔
دوسری جانب بھارتی فضائیہ نے مشرقی پاکستان میں رنگ پور، لال مونیزہٹ اور دیناج پور کے ٹھاکر گاؤں پر بھاری بمباری کی تاہم مجموعی طور پر جنگ کے دسویں روز پاک فوج اور فضائیہ بھارتی افواج کو ہر محاذ پر شکست سے دوچار کر رہی تھیں۔
