دریائے چناب پر سپر بند ٹوٹنے سے پانی آبادیوں میں داخل ہو گیا

شجاع آباد: (دنیا نیوز) دریائے چناب پر سپر بند ٹوٹنے سے پانی آبادیوں میں داخل ہو گیا۔

سیلابی پانی سے دھندوں، گردیز پور، وینس، ماڑھیں طاہر پور، صدیق ولا، بنگالہ بستی، بستی عالم بلوچواں، حسن آباد، بستی مٹھو سمیت درجنوں بستیاں زیر آب آ گئیں۔

نئی بستی نواں شہر، بستی ماڑھایں، بڑا کھو، وینس سمیت دیگر علاقوں کا شہر سے رابطہ منقطع ہو گیا، تمام سڑکیں زیر آب آ گئیں، سیلابی پانی تیزی سے شجاع آباد شہر کی طرف بڑھنے لگا۔

درجنوں بستیوں سے ہزاروں افراد کی نقل مکانی شروع ہو گئی، لوگ محفوظ مقامات پر منتقل ہونے لگے، دو روز قبل دھوندو بند میں شگاف پڑتے ہی لوگوں کی نقل مکانی شروع ہوگئی تھی۔

متاثرین اپنی مدد آپ کے تحت بچوں اور مال مویشی سمیت محفوظ مقامات کی طرف روانہ ہو گئے۔

آباد بند ٹوٹنے کے سبب بڑے پیمانے پر کھڑی مکئی، دھان، کپاس سبزیوں سمیت بڑے پیمانے پر فصلیں تباہ ہو گئیں، سیکڑوں کی تعداد میں لوگ کھلے آسمان تلے زندگی گزارنے پر مجبور ہیں۔

پنجاب میں سیلاب سے 100 افراد جاں بحق، لاکھوں بے گھر

دوسری جانب صوبائی ڈیزاسٹر مینجمنٹ اتھارٹی (پی ڈی ایم اے) پنجاب کے مطابق دریائے راوی، ستلج اور چناب میں سیلاب کے باعث مختلف حادثات میں جاں بحق شہریوں کی تعداد 100 ہو گئی ہے، شدید سیلاب کے باعث پنجاب میں 45 لاکھ 70 ہزار لوگ اور 4700 سے زائد موضع جات متاثر ہوئے ہیں۔

ریلیف کمشنر پنجاب نبیل جاوید کے مطابق متاثرہ علاقوں سے 25 لاکھ 12 ہزار لوگوں اور 20 لاکھ 19 ہزار سے زائد جانوروں کو محفوظ مقامات پر منتقل کیا جا چکا ہے، متاثرہ اضلاع میں 392 ریلیف کیمپس، 493 میڈیکل کیمپس اور 422 ویٹرنری کیمپس بھی قائم کیے ہیں۔

ریلیف کمشنر کے مطابق منگلا ڈیم 93 فیصد اور تربیلا ڈیم 100 فیصد تک بھر چکا ہے جبکہ بھارت میں دریائے ستلج پر موجود بھاکڑا ڈیم 88 فیصد، پونگ ڈیم 94 فیصد اور تھین ڈیم 89 فیصد تک بھر چکا ہے۔

پنجاب کے دریاؤں کی صورتحال

پی ڈی ایم اے پنجاب کے مطابق پنجند کے مقام پر انتہائی اونچے درجے کا سیلاب ہے جہاں پانی کا بہاؤ 5 لاکھ 75 ہزار کیوسک ہے، ہیڈ محمد والا کے مقام پر پانی کا بہاؤ 410.5 فٹ تک ہے جبکہ شیر شاہ برج کے مقام پر پانی کا بہاؤ 392.7 فٹ پر پہنچ گیا ہے جہاں انتہائی حد 393.5 ہے۔

حکام کا کہنا ہے کہ آئندہ 48 گھنٹوں میں ہیڈ محمد والا اور شیر شاہ پل کے مقام پر پانی میں واضح کمی ہو گی۔

پی ڈی ایم اے پنجاب کے مطابق دریائے راوی میں ہیڈ سدھنائی کے مقام پر درمیانے درجے کا سیلاب ہے جبکہ دریائے ستلج میں گنڈا سنگھ والا اور سلیمانکی کے مقام پر نچلے درجے کا سیلاب ہے، دریاؤں کے بالائی علاقوں بارشوں کا سلسلہ رک جانے کے بعد پنجاب کے دریاؤں کا بہاؤ نارمل سطح پر آ رہا ہے۔