اسلام آباد: (دنیا نیوز) وزیراعظم کی خصوصی ہدایت پر این ڈی ایم اے کی جانب سے سیلاب متاثرہ علاقوں میں امدادی آپریشن جاری ہے۔
این ڈی ایم اے نے پنجاب کے ضلع مظفرگڑھ کے متاثرین کے لیے پی ڈی ایم اے پنجاب کو مزید 5000 خیمے فراہم کر دیئے۔
سکھر سے 8 ٹرکوں کے ذریعے 1100 خیمے اور جلوزئی سے 16 اور 15 ٹرکوں پر مشتمل دو قافلوں کے ذریعے مزید 3900 خیمے مظفرگڑھ روانہ کیے گئے ہیں۔
اب تک پنجاب کو 2215 ٹن امدادی سامان فراہم کیا گیا ہے جس میں کمبل، خیمے، مچھر دانیاں، پانی کے فلٹریشن پلانٹ، رضائیاں، فولڈنگ بیڈ، پانی کے کین اور 17 کشتیاں شامل ہیں۔
این ڈی ایم اے اب تک پنجاب کے سیلاب متاثرین کو 35000 خیمے فراہم کر چکا ہے اور تمام سول و عسکری اداروں کے ساتھ مکمل رابطے میں رہتے ہوئے امدادی کارروائیوں کی ہمہ وقت نگرانی کر رہا ہے۔
