اسلام آباد: (دنیا نیوز) پرائیویٹ حج سکیم کے تحت درخواستوں کی وصولی کا آج سے آغاز ہو گیا۔
وزارت مذہبی امور کا کہنا ہے کہ سکیم کے تحت 37 ہزار 900 عازمین درخواستیں جمع کروا سکیں گے، گزشتہ سال رہ جانے والے عازمین کو پرائیویٹ حج آپریٹرز پہلے موقع دیں گے۔
ذرائع کے مطابق گزشتہ سال حج پر نہ جانے والے 22 ہزار 97 عازمین نے رجسٹریشن کروائی ہے، گزشتہ سال حج سے رہ جانے والے عازمین کی رجسٹریشن مکمل ہونے کا پرائیویٹ حج آپریٹرز بیان حلفی دیں گے۔
وزارت مذہبی امور نے کہا ہے کہ اس سال پرائیویٹ حج آپریٹرز کا کوٹہ 60 ہزار مقرر کیا گیا ہے، 22 ہزار 97 عازمین گزشتہ برس حج سے محروم رہ جانے والے اور 37 ہزار 903 نئے درخواست گزار حج پر اس سکیم کے تحت جاسکیں گے۔
