راولپنڈی: (دنیا نیوز) 20 ستمبر 1965 کو پاک فوج نے جنگ کے بیسویں روز بھی بھارتی افواج پر اپنی برتری برقرار رکھی، سیالکوٹ اور جموں سیکٹر میں پاکستانی افواج نے بھارتی مقبوضہ علاقوں پر حملے جاری رکھے۔
واہگہ اٹاری سیکٹر میں دشمن کے 12 ٹینک تباہ کر دیئے گئے، اس طرح بھارت کے اب تک کے تباہ شدہ ٹینکوں کی مجموعی تعداد 494 ہو گئی تھی، راجھستان اور اکھنور سیکٹر میں پاک فوج کی توپوں نے بھارتی توپوں کو مکمل طور پر خاموش کرا دیا۔
پاک فضائیہ نے مزید 4 بھارتی جنگی طیارے مار گرائے جس کے بعد دشمن کے تباہ شدہ جہازوں کی تعداد 110 تک جا پہنچی، فضائیہ کے شاہینوں نے انبالہ، جودھپور، جموں، جام نگر اور ہلواڑہ کے ہوائی اڈوں اور تنصیبات پر کاری ضرب لگاتے ہوئے انہیں ناقابل تلافی نقصان پہنچایا۔
پاک بحریہ نے بھی بحر ہند میں اپنی برتری برقرار رکھی اور بھارتی بحریہ کی نقل و حرکت کو بالکل محدود کر دیا۔
