اسلام آباد: (دنیا نیوز) ڈسٹرکٹ اینڈ سیشن کورٹس اسلام آباد نے آڈیو لیک کیس میں وزیر اعلیٰ خیبر پختونخوا علی امین گنڈا پور کے خلاف ناقابل ضمانت وارنٹ گرفتاری جاری ہونے کے بعد منسوخ کر دیئے گئے۔
ایڈیشنل ڈسٹرکٹ اینڈ سیشن جج نصر من اللہ بلوچ نے علی امین گنڈاپور کی عدم پیشی پر وارنٹ گرفتاری جاری کئے تھے جبکہ نامزد شریک ملزم عدالت میں پیش ہوگیا تھا۔
عدالت نے علی امین گنڈا پور کو گرفتار کر کے پیش کرنے کا حکم دیا جس پر کچھ دیر بعد وزیراعلیٰ کے وکیل راجا ظہور الحسن عدالت میں پیش ہوئے، وکیل راجا ظہور الحسن نے کہا کہ سر آپ نے وارنٹ گرفتاری جاری کر دیئے ہیں، میں آج ہڑتال کی وجہ سے نہیں آیا۔
جج نصر من اللہ بلوچ نے ریمارکس دیے کہ ہڑتال تو وکلاء کی ہوتی ہے لیکن ملزم نے پیش ہونا ہوتا ہے۔
وکیل نے کہا کہ پشاور ہائیکورٹ کا آرڈر ہے، عدالت نے 3 ہفتے کے لئے کسی بھی مقدمے میں گرفتار کرنے سے روکا ہے۔
بعدازاں علی امین گنڈا پور کے وکیل کی جانب سے وارنٹ منسوخی کی درخواست دائر کی گئی، جس پر عدالت نے علی امین گنڈا پور کی وارنٹ منسوخی کی درخواست منظور کر لی، اور علی امین گنڈا پور کو اگلی سماعت پر پیش ہونے کی ہدایت کرتے ہوئے کیس کی مزید سماعت 5 نومبر تک ملتوی کر دی۔
یاد رہے کہ وزیراعلیٰ خیبرپختونخوا علی امین گنڈا پور کے خلاف تھانہ گولڑہ میں مقدمہ درج ہے۔
