اسلام آباد: (دنیا نیوز) این ڈی ایم اے کے نیشنل ایمر جنسیز آپریشن سینٹر نے ملک کے مختلف علاقوں میں ممکنہ بارشوں کے حوالے سے الرٹ جاری کر دیا۔
الرٹ میں کہا گیا کہ اسلام آباد، پنجاب، خیبر پختونخوا اور گلگت بلتستان کے مختلف علاقوں میں 5 تا 7 اکتوبر تک وقفے وقفے سے بارشوں کا امکان ہے، بڑے دریاؤں بشمول دریائے جہلم، راوی، ستلج کے بالائی علاقوں میں بھی بارشیں متوقع ہیں۔
خیبر پختونخوا میں چترال، ڈیر، ہری پور، کوہاٹ، کوہستان، خیبر، کرم اور مانسہرہ میں وقفے وقفے بارشوں ہو سکتی ہیں، مہمند، نوشہرہ، مالاکنڈ، چارسدہ، ابیٹ آباد، بنوں، بونیر، ہزارہ، پشاور صوابی، وزیرستان اور ملحقہ علاقوں میں گرج چمک کے ساتھ بارشوں کا امکان ہے۔
الرٹ کے مطابق ممکنہ بارشوں کے باعث دریائے سوات، پنجکوڑا اور درکابل کے بہاؤ میں بھی اضافہ متوقع ہے، گلگت بلتستان میں ممکنہ بارشوں کے باعث پہاڑی علاقوں میں لینڈ کے واقعات کا خدشہ ہے۔
لینڈ سلائیڈنگ سے ممکنہ طور پر طورغر روڈ 120، بٹگرام روڈ 140، شانگلہ روڈ 160، لوئر کوہستان روڈ 180، تتہ پانی روڈ 320 تا 360 متاثر ہو سکتی ہیں، گلگت روڈ 400 تا 420 اور ہنزہ روڈ 530 اور روندو سمیت سکردو اور سکردو جگلوٹ روڈ کے مختلف مقامات پر بھی لینڈ سلائیڈنگ کا خدشہ ہے۔
این ڈی ایم اے کا کہنا ہے کہ عوام پہاڑی علاقوں میں لینڈ سلائیڈز کے خطرے کے پیشِ نظر غیر ضروری سفر سے گریز کریں، موسم اور سڑکوں کی صورتحال سے باخبر رہنے کے لیے ریڈیو، ٹی وی اور پاک این ڈی ایم اے ڈیزاسٹر الرٹ سے رہنمائی لیں۔
نیشنل ایمرجنسیز آپریشن سینٹر تمام متعلقہ اداروں کو بر وقت معلومات کی فراہمی یقینی بنا رہا ہے، این ڈی ایم اے تمام متعلقہ اداروں کے ساتھ مکمل رابطے میں ہے، مقامی انتظامیہ کی ہدایات پر فوری عمل کریں اور ہنگامی حالات میں متعلقہ اداروں کے ساتھ تعاون کریں۔
