اسلام آباد: (دنیا نیوز) وفاقی دارالحکومت کے تمام داخلی و خارجی راستوں پر ٹریفک معمول کے مطابق رواں دواں ہے، جڑواں شہروں میں چلنے والی میٹرو بس سروس بھی مکمل طور پر بحال ہو چکی ہے۔
اسلام آباد ٹریفک پولیس کا کہنا ہے کہ شہر کے تمام داخلی و خارجی راستوں پر ٹریفک معمول کے مطابق چل رہی ہے اور پولیس اہلکار ٹریفک کی روانی برقرار رکھنے کیلئے مختلف مقامات پر تعینات ہیں۔
ترجمان اسلام آباد پولیس کے مطابق چیف ٹریفک آفیسر کیپٹن (ر) حمزہ ہمایوں ذاتی طور پر تمام ٹریفک ڈیوٹیز کی نگرانی کر رہے ہیں، لین وائلیشن، ون ویلنگ، غلط سمت میں ڈرائیونگ اور فینسی نمبر پلیٹس کے خلاف کارروائی جاری ہے۔
پولیس نے شہریوں سے اپیل کی ہے کہ وہ ٹریفک قوانین کی مکمل پابندی کریں، موٹرسائیکل سوار اور بڑی گاڑیاں اپنی لین میں رہیں اور ٹریفک اہلکاروں کے ساتھ تعاون کریں، ٹریفک قوانین پر سختی سے عملدرآمد شہریوں کی جان و مال کے تحفظ کیلئے کیا جا رہا ہے، شہری روڈز کی تازہ صورتحال جاننے کیلئے 1915 پر کال کریں یا ایف ایم 92.4 سے رہنمائی حاصل کریں۔
دوسری جانب جڑواں شہروں میں چلنے والی میٹرو بس سروس بھی مکمل طور پر بحال ہو چکی ہے۔
ضلعی انتظامیہ کا کہنا ہے کہ میٹرو بس سروس 4 روز کے بعد صدر سٹیشن تا پاک سیکرٹریٹ تک مکمل بحال ہوگئی ہے۔
