پشاور: (ذیشان کاکاخیل) خیبر پختونخوا میں سرکاری سکولوں کے نویں اور دسویں جماعت کے سالانہ امتحانات میں ناقص کارکردگی پر محکمہ تعلیم نے تحقیقات کا آغاز کر دیا۔
ذرائع کے مطابق جن سکولوں کے نتائج 40 فیصد سے کم رہے ان کے سربراہان اور متعلقہ اساتذہ کے خلاف کارروائی کا فیصلہ کیا گیا ہے۔
محکمہ تعلیم خیبر پختونخوا نے آج متعلقہ سکولوں کے سربراہان اور سٹاف کو ریکارڈ سمیت پیش ہونے کی ہدایت جاری کی ہے، اس سلسلے میں نوشہرہ، صوابی اور مردان کے ضلعی ایجوکیشن افسران کو بھی طلب کیا گیا ہے۔
تحقیقات کا مقصد ناقص کارکردگی کی وجوہات کا تعین اور تعلیمی معیار میں بہتری کے لیے ذمہ داران کے خلاف مناسب کارروائی کرنا ہے، محکمہ تعلیم نے واضح کیا ہے کہ نتائج بہتر نہ بنانے والے سکول سربراہان اور اساتذہ کے خلاف سخت ایکشن لیا جائے گا۔
