اسلام آباد: (ویب ڈیسک) جدید اصلاحات اور ٹیکنالوجی پر مبنی منصوبے کے تحت سپریم کورٹ میں زیرِ التوا مقدمات کی تعداد میں کمی ریکارڈ کی گئی ہے۔
چیف جسٹس آف پاکستان جسٹس یحییٰ خان آفریدی نے اصلاحات اور ٹیکنالوجی پر مبنی منصوبہ شروع کیا، سال 2015ء میں زیرِ التوا مقدمات 25 ہزار 686 تھے جبکہ 2024ء میں ان مقدمات کی تعداد 60 ہزار 446 تک جا پہنچی تھی، اکتوبر 2024ء میں چیف جسٹس نے زیر التوا مقدمات میں کمی کو اولین ترجیح قرار دیا۔
اس ضمن میں جوڈیشل ریفارم ایکشن پلان کے تحت عدالتی نظام کی جدت اور شفافیت پر توجہ دی گئی، ڈیجیٹل فائلنگ، آن لائن کیس ٹریکنگ اور الیکٹرانک تصدیق شدہ نقول کا آغاز کیا گیا، اس کے علاوہ رجسٹری اور بینچوں کے درمیان رابطہ اور ہم آہنگی میں بھی بہتری لائی گئی۔
ڈیٹا پر مبنی نظام کے ذریعے فیصلوں میں شفافیت اور رفتار میں اضافہ ہوا، 2024ء کے آغاز میں 60 ہزار 446 جبکہ رواں سال کی عدالتی کارروائیوں کے بعد اب زیر التوا کیسز کی تعداد 56 ہزار 169 رہ گئی ہے۔
