راولپنڈی: (دنیا نیوز) انسداد دہشت گردی عدالت نے 26 نومبر احتجاج کے کیس میں بانی پی ٹی آئی کی ہمشیرہ علیمہ خان کے 10 ویں بار ناقابل ضمانت وارنٹ گرفتاری جاری کر دیئے۔
انسداد دہشت گردی عدالت کے جج امجد علی شاہ نے مقدمے کی سماعت کی، علیمہ خان آج بھی پیش نہیں ہوئیں جبکہ ملزمان حاضری کے بعد روانہ ہوگئے، مقدمے کے دیگر 10 ملزمان عدالت میں پیش ہوئے۔
وکیل صفائی فیصل ملک کا کہنا تھا کہ علیمہ خان آج بھی پیش نہیں ہوں گی، ہم مقدمے کی دہشت گردی کی دفعہ چیلنج کر چکے ہیں، یہ دہشت گردی کی دفعات کا کیس ہی نہیں بنتا۔
عدالت نے علیمہ خان کو گرفتار کر کے 17 نومبر کو پیش کرنے کا حکم دیتے ہوئے سماعت ملتوی کر دی۔
عدالت نے علیمہ خان کی اسلام آباد اور پنجاب بھر میں ملکیتی پراپرٹی کی دوبارہ تفصیلات بھی طلب کر لیں جبکہ بینک اکاؤنٹس منجمند نہ کرنے پر 2 بینک منیجرز کو شوکاز نوٹس جاری کر دیا گیا۔
یاد رہے کہ انسداد دہشت گردی عدالت نے علیمہ خان کو 9 مرتبہ وارنٹ گرفتاری جاری کر کے آج گرفتار کر کے پیش کرنے کا حکم دیا تھا، 5 گواہان کو طلب کیا گیا تھا۔
واضح رہے کہ علیمہ خان سمیت 11 ملزمان کے خلاف تھانہ صادق آباد میں مقدمہ درج ہے، علیمہ خان اور دیگر پر جلاؤ گھیراؤ، کار سرکار میں مداخلت اور کارکنان کو پُرتشدد احتجاج پر اکسانے کا الزام ہے۔
