لاہور: (دنیا نیوز) وزیر اعلیٰ پنجاب مریم نواز شریف نے جدید ٹریفک سسٹم اور اصلاحات کے نفاذ کا حکم دے دیا۔
ترجمان پنجاب پولیس کا کہنا ہے کہ لاہور سمیت صوبہ بھر میں ٹریفک قوانین کی خلاف ورزیوں پر کریک ڈاؤن جاری ہے، گزشتہ 24 گھنٹوں کے دوران ٹریفک قوانین کی خلاف ورزی پر 3195 قانون شکن گرفتار اور 3215 مقدمات درج کئے گئے۔
حکام کے مطابق 12 ہزار 814 گاڑیاں، موٹرسائیکلیں اور رکشے تھانوں میں بند کر دیئے گئے، ٹریفک قوانین کی خلاف ورزی پر 50 ہزار 480 چالان کئے جن میں 6 کروڑ 30 لاکھ روپے سے زائد جرمانے عائد کئے گئے۔
ترجمان نے مزید بتایا کہ دھواں چھوڑنے والی 3511 گاڑیوں کے چالان ہوئے جبکہ 384 گاڑیاں تھانوں میں بند کی گئیں، 3 گاڑیوں کے فٹنس سرٹیفکیٹ ضبط کئے گئے، جبکہ 42 ہزار 561 افراد کو ڈرائیونگ لائسنس جاری کئے گئے۔
