راولپنڈی :(دنیا نیوز) بحرین نیشنل گارڈ کے کمانڈر جنرل شیخ محمد بن عیسیٰ بن سلمان نے جی ایچ کیو کا دورہ کیا اور فیلڈ مارشل سید عاصم منیر سے ملاقات کی۔
پاک فوج کے شعبہ تعلقات عامہ (آئی ایس پی آر) کے مطابق ملاقات میں باہمی دلچسپی، علاقائی سلامتی اور دوطرفہ تعاون پر بات چیت کی گئی، فریقین نے موجودہ عسکری تعلقات کو مزید فروغ دینے کے عزم کا اعادہ کیا۔
یہ بھی پڑھیں:فیلڈ مارشل سے رائل سعودی لینڈ فورسز کے کمانڈر کی ملاقات، باہمی اُمور پر تبادلہ خیال
مہمان جنرل نے علاقائی سلامتی اور استحکام کیلئے پاک فوج کے کردار کو سراہا، فیلڈ مارشل نے پاکستان اور بحرین کے درمیان دیرینہ برادرانہ تعلقات کو اُجاگر کیا۔
دوسری جانب ترجمان پاک فوج نے مزید بتایا کہ فیلڈ مارشل نے تمام شعبوں میں بحرین کیلئے تعاون جاری رکھنے کے عزم کا بھی اظہار کیا۔
