لاہور: (محمد اشفاق)لاہور ہائیکورٹ نے بیوی سے زبردستی غیر فطری جنسی تعلقات قائم کرنے اور نازیبا ویڈیوز بنانے کے ملزم کی عبوری ضمانت کنفرم کردی۔
لاہور ہائیکورٹ کے جسٹس طارق ندیم نے ملزم عون محمد کی عبوری ضمانت پر 7صفحات پر مشتمل تحریری فیصلہ جاری کردیا۔
فیصلے میں کہا گیا ہے کہ ایف آئی آر کے مطابق ملزم نے بیوی کو غیر فطری جنسی تعلقات قائم کرنے پر مجبور کیا اور ملزم نے بیوی کی نازیبا تصاویر بھی بنائی جبکہ درخواست گزارکے مطابق گھریلو جھگڑوں کے باعث بیوی نے مقدمہ درج کرایا۔
فیصلے میں مزید کہا گیا ہے کہ شریعت کے مطابق بیوی سے غیر جنسی تعلقات قائم کرنا ممنوع ہے، عبوری ضمانت ایک غیر معمولی ریلیف ہے جو غیر معمولی حالات میں دیا جاتا ہے، ریکارڈ کے مطابق وقوعہ کا تین ماہ تاخیر کے بعد مقدمہ درج کیا گیا۔
ایف آئی آر کے مطابق شوہر نے شادی کے فوری بعد بیوی پر تشدد اور ہراسمنٹ شروع کردی لیکن شکایت کنندہ نے کسی فورم پر کوئی رجوع نہیں کیا، یہ امر اس بات کی نشاندہی کرتا ہے کہ شکایت کنندہ کے دل میں شوہر کے لئے کوئی رنجش موجود تھی، ان حالات میں ممکن ہے کہ شکایت کنندہ نے درخواست گزار کو ازدواجی تنازع میں دباو ڈالنے کے لیے جھوٹے کیس میں ملوث کیا ہو۔
فیصلے میں مزید کہا گیا ہے کہ شکایت کنندہ نے شوہر پر غیر فطری جنسی تعلقات قائم کرنے کے الزامات لگائے لیکن میڈیکل رپورٹ اور ڈی این اے رپورٹ میں ایسی کوئی چیز ثابت نہیں ہوئی، درخواست گزار کی حد تک تفتیش مکمل ہے اور درخواست گزار پر ضمانت کا ناجائز استعمال کرنے کا الزام نہیں ہے۔
عدالت نے درخوست گزار کی عبوری ضمانت کی 5لاکھ ضمانتی مچلکوں کے عوض توثیق کردی۔
