چترال: (دنیا نیوز) چترال کے علاقے گہریت گول میں ایک غیرملکی شکاری نے کشمیری مارخور کا شکار کر لیا۔
محکمہ جنگلی حیات کے مطابق روسی شکاری نے مارخور کے شکار کا لائسنس 68 ہزار امریکی ڈالرز میں حاصل کیا تھا، یہ شکار کمیونٹی بیسڈ ٹرافی ہنٹنگ پروگرام کے تحت کیا گیا جبکہ شکار کیے گئے مارخور کے سینگوں کی لمبائی 41 انچ ریکارڈ کی گئی ہے، شکار نان ایکسپورٹیبل کوٹے کے تحت کیا گیا جس کے تحت شکار شدہ جانور ملک سے باہر منتقل نہیں کیا جا سکتا۔
حکام کا کہنا ہے کہ ہنٹنگ پروگرام سے حاصل ہونے والی آمدن کا بڑا حصہ مقامی آبادی کی فلاح و بہبود پر خرچ کیا جائے گا، اس پروگرام کا بنیادی مقصد جنگلی حیات کا تحفظ، غیر قانونی شکار کی روک تھام اور مقامی لوگوں کو معاشی فوائد فراہم کرنا ہے۔
محکمہ جنگلی حیات نے واضح کیا کہ ٹرافی ہنٹنگ پروگرام بین الاقوامی قوانین اور مقررہ ضوابط کے مطابق جاری رکھا جا رہا ہے تاکہ نایاب جانوروں کے تحفظ کو یقینی بنایا جا سکے۔
