اسلام آباد: (دنیا نیوز) پاکستان اور بھارت کے درمیان نئے سال کے آغاز پر قیدیوں اور جوہری تنصیبات کی فہرستوں کا تبادلہ ہو گیا۔
ہفتہ وار نیوز بریفنگ کے دورران دفترخارجہ کے ترجمان طاہر حسین اندرانی نے کہا کہ پاکستان اوربھارت کے درمیان قیدیوں کی فہرستوں کا تبادلہ ہوا،257بھارتی قیدیوں کی فہرستوں کا تبادلہ کیا گیا، معاہدے کے تحت پاکستان اوربھارت سال میں دوبار قیدیوں کی فہرست کا تبادلہ کرتے ہیں۔
وزارت خارجہ کے ترجمان نے بتایا کہ پاکستان اوربھارت کے درمیان نیوکلیئرانسٹالیشن کی فہرست کا بھی تبادلہ یکم جنوری کو کیا جاتا ہے، پاکستان نے اپنی فہرست بھارت کے حوالے کردی ہے۔
بھارت سے چناب پر ڈیم منصوبے کی تفصیلات طلب
طاہر حسین اندرابی نے کہا کہ پاکستان تائیوان پر چین کے مؤقف کی حمایت کرتا ہے، بھارت کی طرف دریائے چناب پر متنازعہ بجلی منصوبے سے متعلق میڈیا رپورٹس دیکھی ہیں، بھارت نے اس ضمن میں کوئی باضابطہ اطلاع نہیں دی، بھارت کھ کوئی یکطرفہ اقدام سندھ طاس معاہدے کی حیثیت کو تبدیل نہیں کرسکتا۔
وزارت خارجہ کے ترجمان نے کہا کہ بھارت کے چناب پر ڈیم بنانے کی منظوری پر پاکستان نے تفصیلات طلب کر لی ہیں، ڈیم بنانے سے متعلق انڈس واٹر کمشنر نے تفصیلات طلب کی ہیں، بھارت پر زور دیتے ہیں کہ وہ تفصیلات فراہم کرے۔
انہوں نے مزید کہا کہ اس ڈیم منصوبے سے متعلق ابھی تک کوئی انفارمیشن شئیر نہیں کی گئی، سندھ طاس معاہدے کے تحت منصوبہ بنے سے پہلے تفصیلات شئیر کرنا ہوتا ہے، بھارت سندھ طاس معاہدے کی پاسداری کرے۔
یمن تنازع کے پرامن حل کی حمایت
انہوں نے کہا کہ پاکستان یمن کے تنازع کے پرامن حل کی حمایت کرتا ہے، پاکستان یمن میں صورتحال معمول پر لانے کیلئے علاقائی کوششوں کا خیرمقدم کرتا ہے، وزیراعظم اورسعودی ولی عہد کے درمیان ٹیلی فونک رابطہ ہوا، دونوں رہنماؤں نے دوطرفہ تعلقات اورتعاون کو مضبوط بنانے کےعزم کا اعادہ کیا۔
طاہر حسین اندرابی نے بتایا کہ نائب وزیراعظم اسحاق ڈار کاسعودی عرب کے وزیر خارجہ سے ٹیلی فون پر رابطہ ہوا، متحدہ عرب امارات کے صدر نے حال ہی میں پاکستان کا سرکاری دورہ کیا، وزیراعظم اورصدریواے ای کی ملاقات میں دوطرفہ تعلقات اورتعاون پر بات چیت ہوئی۔
وزارت خارجہ کے ترجمان نے آگاہ کیا کہ سپیکر قومی اسمبلی ایازصادق نے بنگلادیش کی سابق وزیراعظم کی نمازجنازہ میں پاکستان کی نمائندگی کی، سپیکر قومی اسمبلی نےمرحومہ خالدہ ضیا کے بیٹے اوربیٹی سے تعزیت کی۔
صومالیہ کی خودمختاری، علاقائی سالمیت کی حمایت کرتے ہیں
ترجمان دفترخارجہ نے کہا کہ پاکستان اسرائیل کی جانب سے صومالی لینڈکو الگ ملک تسلیم کرنے کے اقدام کو مسترد کرتا ہے، پاکستان صومالیہ کی خودمختاری اورعلاقائی سالمیت کی حمایت کرتا ہے۔
وزارت خارجہ کے ترجمان نے میڈیا کو بتایا کہ اسحاق ڈار چین کا دورہ کریں گے، وہ پاک چین وزارت خارجہ کے اسٹریٹجک ڈائیلاگ میں شریک ہوں گے، افغانستان کے ساتھ باڈر بند ہونے کے بعد ہمارا سفارت خانہ پاکستانی شہریوں کے ساتھ رابطے میں ہے، 1100 سے ذائد پاکستانیوں نے کابل میں سفارت خانے سے رابطہ کیا ہے۔
ترجمان نے آگاہ کیا کہ اسحاق ڈار کو تبوک کے گورنر نے ٹیلیفون کال کی، ازبکستان کے وزیر خارجہ نے اسحاق ڈار کو ٹیلفون کال کی، ازبکستان کے صدر کے اگلے مہینے دورے پر گفتگو ہوئی، صومالیہ کے وزیر خارجہ نے اسحاق ڈار کو ٹیلفون کال کی اور شکریہ ادا کیا۔
