لاہور: (دنیا نیوز) جامعہ اشرفیہ کے ناظم مولانا فضل الرحیم اشرفی انتقال کر گئے، وزیراعظم شہباز شریف نے گہرے دکھ کا اظہار کیا ہے۔
مولانا فضل الرحیم اشرفی طویل عرصے سے علیل تھے، مرحوم کی نمازجنازہ دوپہر2بجے جامعہ اشرفیہ میں اداکی جائے گی۔
وزیراعظم شہباز شریف نے گہرے دکھ کا اظہار کرتے ہوئے کہا کہ حافظ فضل الرحیم اشرفی ایک جید عالمِ دین، ممتاز محدث اور دینی تعلیم کے فروغ میں نمایاں خدمات انجام دینے والی عظیم شخصیت تھے۔
انہوں نے کہا کہ مولانا فضل الرحیم نے اپنی پوری زندگی قرآن و سنت کی تعلیم، دینی اقدار کے فروغ اور اخلاقی تربیت کے لیے وقف کر رکھی تھی جس سے بے شمار طلبہ و علما نے استفادہ کیا، مرحوم کی علمی و دینی خدمات کو ہمیشہ یاد رکھا جائے گا۔
وزیراعلیٰ پنجاب مریم نواز شریف نے جامعہ اشرفیہ کے مولانا فضل الرحیم کے انتقال پر اظہار افسوس اور سوگوار خاندان سے اظہارِ ہمدردی و تعزیت کیا ہے۔
صدر استحکام پاکستان پارٹی عبدالعلیم خان نے مولانا فضل الرحیم اشرفی کی رحلت پر اظہار افسوس کیا اور کہا کہ اہل خانہ اور سے اظہار تعزیت اور صبر کی دعا کرتے ہیں، علم کی جو شمع انہوں نے روشن کی وہ ہمیشہ فروزاں رہے گی، ان کی دینی و مذہبی خدمات کو ہمیشہ یاد رکھا جائے گا۔
مفتی محمد زبیر نے کہا کہ مولانا فضل الرحیم اشرفی کا انتقال علمی اور روحانی دنیا ناقابل تلافی نقصان ہے، مولانا فضل الرحیم اشرفی نہایت مشفق و دلآویز شخصیت کے مالک تھے۔
