مناوگت: (ویب ڈیسک) پاکستان نے آئی ٹی ایف ماسٹرز ورلڈ ٹینس چیمپئن شپ کے مکسڈ ڈبلز میں ایک اور گولڈ میڈل جیت لیا۔
پاکستان کے اعصام الحق قریشی نے اپنی فرانسیسی پارٹنر میگالی جیرارڈ کے ساتھ ملکر ترکیہ کے شہر مناوگت میں ہونے والی آئی ٹی ایف ماسٹرز 40 پلس ورلڈ چیمپئن شپ مکسڈ ڈبلز کیٹیگری میں اعزاز اپنے نام کیا۔
ایک سنسنی خیز فائنل میں اعصام اور میگالی جیرارڈ نے جرمنی کی کیتھرینا راتھ اور اینڈریاس تھیوسن کو 7-5، 6-3 سے شکست دے کر چیمپئن شپ کا ٹائٹل جیتا، میچ میں ڈرامائی تبدیلی دیکھنے میں آئی، کیونکہ اعصام اور ان کے ساتھی پہلے سیٹ میں 5-2 سے نیچے تھے، اس کے بعد وہ دوسرے سیٹ پر حاوی رہے اور 6-3 سے فتح حاصل کی۔
قومی ٹینس سپر سٹار اعصام الحق نے کہا کہ میں اللہ کا شکر ادا کرتا ہوں کہ اس نے مجھے پاکستان کیلئے ایک اور طلائی تمغہ حاصل کرنے کی طاقت عطا کی، یہ فتح قوم کیلئے وقف ہے۔
ان کا کہنا تھا کہ یوم پاکستان (23 مارچ) کے موقع پر ایک خصوصی تحفہ، بین الاقوامی سٹیج پر پاکستان کے پرچم کو بلند ہوتے دیکھ کر میرا دل فخر سے بھر جاتا ہے اور ملک کے جذبے کو تسلیم کرنے کیلئے یہ ایک عظیم جذبہ ہے۔
