لندن: (دنیا نیوز) سربین ٹینس لیجنڈ نوواک جوکووچ نے ومبلڈن کے سنٹر کورٹ پر آسٹریلیا کے الیگز ڈے مینار کو سخت مقابلے کے بعد 1-6، 6-4، 6-4، 6-4 سے شکست دے کر اپنے کیریئر کا 16 واں ومبلڈن کوارٹر فائنل کھیلنے کا اعزاز حاصل کر لیا۔
میچ کے آغاز میں 38 سالہ جوکووچ سست اور غیر معمولی حد تک محتاط دکھائی دیئے اور پہلا سیٹ 1-6 سے ہار بیٹھے لیکن اس کے بعد انہوں نے اپنی روایتی مہارت اور تجربے کا مظاہرہ کرتے ہوئے مسلسل تین سیٹ جیت کر مقابلہ اپنے نام کر لیا۔
اس فتح کے ساتھ 7 بار کے چیمپئن جوکووچ ایک بار پھر ریکارڈ 25ویں گرینڈ سلیم ٹائٹل کی جانب گامزن ہیں، اگر وہ اتوار کو فائنل جیتتے ہیں تو وہ آل انگلینڈ کلب میں راجر فیڈرر کے 8 ٹائٹلز کے ریکارڈ کو بھی برابر کر دیں گے۔
دلچسپ بات یہ ہے کہ ریٹائرڈ سوئس لیجنڈ راجر فیڈرر خود یہ میچ رائل باکس میں بیٹھ کر دیکھ رہے تھے، اس موقع پر جوکووچ نے مسکراتے ہوئے کہا کہ شاید پہلی بار ایسا ہوا ہے کہ راجر نے میرا میچ دیکھا اور میں جیت گیا، پچھلی چند بار میں ہار گیا تھا اس لیے یہ بدشگونی ختم کرنا اچھا لگا۔
انہوں نے مزید کہا کہ راجر ایک عظیم چیمپئن ہیں جنہیں میں بہت سراہتا ہوں، ہم نے برسوں تک ایک دوسرے کے ساتھ اس کھیل کے سٹیج کو شیئر کیا، انہیں دوبارہ یہاں دیکھ کر خوشی ہوئی۔
پہلے سیٹ میں جوکووچ نے 16 غیر ضروری غلطیاں کیں جن میں چار ڈبل فالٹس شامل تھے، تاہم دوسرے سیٹ میں واپسی کی کوشش کرتے ہوئے وہ جلدی بریک حاصل کرنے میں کامیاب ہوئے مگر 19 منٹ پر محیط ایک طویل گیم کے دوران ڈے مینار نے چھٹے بریک پوائنٹ پر سروس بریک کر لی۔
میچ کا فیصلہ کن موڑ چوتھے سیٹ میں آیا، جب ڈے مینار نے 1-4 کی برتری حاصل کر لی مگر دباؤ میں آ کر وہ پے در پے پانچ گیمز ہار گئے اور جوکووچ نے تین گھنٹے اور 18 منٹ کے بعد فتح سمیٹ لی۔
میچ کے بعد جوکووچ نے کہا کہ میں ابھی بھی پورے میچ کو ذہن میں دہرا رہا ہوں، آغاز میرے لیے مشکل تھا لیکن میں صحیح وقت پر مقابلے میں ڈٹا رہا اور یہی میری کامیابی کی بنیاد بنی۔
ومبلڈن کے 16 کوارٹر فائنلز کھیلنے والے جوکووچ اس میدان میں فیڈرر کے 18 کوارٹر فائنلز کے بعد دوسرے نمبر پر ہیں، اب کوارٹر فائنل میں جوکووچ کا مقابلہ اٹلی کے 22ویں سیڈ فلیویو کوبولی سے ہوگا جبکہ ممکنہ سیمی فائنل میں ان کا ٹاکرا عالمی نمبر ایک یانیق سنر سے ہو سکتا ہے۔
